రంజీ ట్రోఫీలో సెమీస్‌కు హైదరాబాద్

దిశ, స్పోర్ట్స్ : రంజీ ట్రోఫీలో ప్లేట్ గ్రూపులో హైదరాబాద్ జట్టు సెమీస్‌కు దూసుకెళ్లింది. టోర్నీలో అదరగొడుతున్న హైదరాబాద్ టీమ్ వరుసగా ఐదో విజయం నమోదు చేసింది. హైదరాబాద్ వేదికగా మిజోరంతో జరిగిన చివరి గ్రూపు మ్యాచ్‌లో ఇన్నింగ్స్ 73 పరుగుల తేడాతో విజయం సాధించింది. మూడో రోజు స్పిన్నర్ తనయ్ త్యాగరాజన్(5/74) ఐదు వికెట్ల ప్రదర్శనతో ప్రత్యర్థిని కూల్చడంతో మరో రోజు మిగిలి ఉండగానే హైదరాబాద్ గెలుపు తీరాలకు చేరింది. మొదట ఓవర్‌నైట్ స్కోరు 458/8తో ఆట కొనసాగించిన హైదరాబాద్ మరో 7 పరుగులు మాత్రమే జోడించి 465/9 స్కోరు వద్ద తొలి ఇన్నింగ్స్‌ను డిక్లేర్డ్ ఇచ్చింది. మొదటి రోజు మిజోరం 199 పరుగులకు ఆలౌటైన విషయం తెలిసిందే. దీంతో తొలి ఇన్నింగ్స్‌లో 266 పరుగుల భారీ ఆధిక్యం దక్కింది. దీంతో తొలి సెషన్‌లో రెండో ఇన్నింగ్స్‌కు దిగిన మిజోరం 193 పరుగులకే ఆలౌటైంది. కెప్టెన్ రాల్టే(40) టాప్ స్కోరర్. మిగతా బ్యాటర్లు తేలిపోవడంతో హైదరాబాద్ ఇన్నింగ్స్ విజయం సాధించింది. దీంతో హైదరాబాద్ ప్లేట్ గ్రూపులో 34 పాయింట్లతో టాప్ పొజిషన్‌లో సెమీస్‌కు చేరుకుంది. ఈ నెల 9 నుంచి 13 వరకు జరిగే సెమీస్‌లో నాగాలాండ్‌తో హైదరాబాద్ తలపడనుంది.