pink ball test : పింక్ బాల్ టెస్టులో ఆసీస్‌పై భారత్ రివేంజ్ తీర్చుకుంటుందా..!

దిశ, స్పోర్ట్స్ : బోర్డర్-గవాస్కర్ ట్రోఫీని విజయంతో ఆరంభించిన భారత్ అడిలైడ్ టెస్ట్‌పై కన్నేసింది. ఇప్పటికే సిరీస్‌లో 1-0 ఆధిక్యంలో ఉన్న భారత్ ఈ మ్యాచ్‌లో గెలిచి 2-0 లీడ్‌లోకి దూసుకెళ్లాలని భావిస్తోంది. అయితే డిసెంబర్ 6 నుంచి అడిలైడ్ వేదికగా జరగనున్న డే అండ్ నైట్ టెస్ట్ మ్యాచ్‌లో భారత్ పింక్ బాల్‌తో ఆస్ట్రేలియాతో తలపడనుంది. 2019లో తొలిసారి భారత్ పింక్ బాల్ టెస్ట్ మ్యాచ్‌లను ఆడటం ప్రారంభించింది. టీంఇండియా ఇప్పటి వరకు 4 పింక్ బాల్ టెస్ట్ మ్యాచ్‌లు ఆడగా.. అందులో మూడింటిలో గెలిచింది. భారత్ 2019లో తొలిసారి తన తొలి పింక్ బాల్ టెస్ట్ జర్నీని స్టార్ట్ చేసింది. కొల్‌కతా వేదికగా ఈడెన్ గార్డెన్స్‌లో ఫస్ట్ టైం బంగ్లాదేశ్‌తో తలపడింది. ఆ మ్యాచ్‌లో ఇషాంత్ శర్మ అద్భుతంగా రాణించి రెండు ఇన్నింగ్స్‌లో కలిపి మొత్తం తొమ్మిది వికెట్లు(5/22, 4/56) పడగొట్టడంతో భారత్ ఘన విజయం సాధించింది. విరాట్ కోహ్లీ ఈ మ్యాచ్‌లో 136 పరుగులు చేసి డే అండ్ నైట్ టెస్ట్ మ్యాచ్‌లో సెంచరీ చేసిన తొలి భారత బ్యాట్స్‌మెన్‌గా నిలిచాడు. ఇషాంత్, షమి, ఉమేష్ యాదవ్ పేస్ అటాక్ కారణంగా భారత్ ఈ మ్యాచ్‌లో ఇన్నింగ్స్ 46 పరుగుల తేడాతో విజయం సాధించింది.

ఆస్ట్రేలియాతో మ్యాచ్‌లో చిత్తుగా ఓటమి..

2020లో అడిలైడ్ ఓవల్‌లో భారత్ ఆస్ట్రేలియాతో డే అండ్ నైట్ టెస్ట్ మ్యాచ్‌లో తలపడింది. అయితే ఈ మ్యాచ్‌లో భారత్ తొలి ఇన్నింగ్స్‌లో 244 పరుగులు చేసి ఆస్ట్రేలియాను 191 పరుగులకే కట్టడి చేసింది. అయితే సెకండ్ ఇన్నింగ్స్‌లో మాత్రం అనూహ్యంగా 36 పరుగులకే ఆలౌట్ అయి టెస్టుల్లో అత్యల్ప స్కోరును నమోదు చేసింది. ప్యాట్ కమ్మిన్స్, హేజిల్ వుడ్ రాణించడంతో ఈ మ్యాచ్ లో ఆస్ట్రేలియా 8 వికెట్ల తేడాతో విజయం సాధించింది. ఓటమి తర్వాత భారత్ అద్భుతంగా పుంజుకోవడంతో సిరీస్‌ను 2-1 తేడాతో గెలుపొందింది.

36 ఆలౌట్ తర్వాత బౌన్స్ బ్యాక్

2021లో స్వదేశంలో జరిగిన పింక్ బాల్ టెస్ట్ మ్యాచ్‌లో భారత్ ఇంగ్లాండ్‌పై ఘన విజయం సాధించింది. అహ్మాదాబాద్ లోని నరేంద్ర మోడీ స్టేడియంలో జరిగిన ఈ మ్యాచ్ భారత స్పిన్ ధాటికి కేవలం రెండు రోజుల్లోనే ముగిసింది. అక్షర్ పటేల్ 11 వికెట్లు(6/38, 5/32), అశ్విన్ 7 వికెట్లు పడగొట్టి కీలకమైన హాఫ్ సెంచరీ చేయడంతో భారత్ 10 వికెట్లతో తేడాతో గెలుపొందింది. ఇంగ్లాండ్ రెండు ఇన్నింగ్స్‌ల్లో కేవలం 112, 81 పరుగులకే ఆలౌట్ అయింది. సొంత గడ్డపై భారత స్పిన్ బలాన్ని ఈ టెస్ట్ మ్యాచ్ నిరూపించింది.

డే అంట్ నైట్ టెస్టు మ్యాచ్‌ల్లో నాలుగింట మూడు గెలుపు..

2022లో శ్రీలంకతో బెంగళూరులోని చిన్నస్వామి స్టేడియంలో జరిగిన మ్యాచ్‌లో భారత్ 238 పరుగుల భారీ తేడాతో ఘన విజయం సాధించింది. తొలుత బ్యాటింగ్ చేసిన భారత్ శ్రేయస్ అయ్యర్(92) రాణించడంతో తొలి ఇన్నింగ్స్‌లో 252 పరుగులు చేసింది. బుమ్రా(5/24) ధాటికి శ్రీలంక కేవలం 109 పరుగులకే ఆలౌట్ అయింది. రెండో ఇన్నింగ్స్‌లో సైతం శ్రేయస్ అయ్యర్ 67 రాణించడంతో శ్రీలంక ముందు భారత్ 447 పరుగుల లక్ష్యాన్ని నిర్దేశించింది. అశ్విన్, అక్షర్ పటేల్ ఈ మ్యాచ్‌లో ధాటికి శ్రీలంక రెండో ఇన్నింగ్స్‌లో 208 పరుగులకే ఆలౌట్ అయింది.2020 అడిలైడ్ టెస్ట్ మ్యాచ్‌కు ప్రతీకారం తీర్చుకోవాలని భారత్ కసిగా బరిలోకి దిగుతోంది. ఆస్ట్రేలియా ఇప్పటి వరకు డే అండ్ నైట్ టెస్ట్ మ్యాచ్‌ల్లో ఓటమి ఎరగకుండా తన ప్రస్థానాన్ని అప్రతిహసంగా కొనసాగిస్తోంది. ఆడిన 12 మ్యాచ్‌ల్లో 11 గెలిచింది.