Virat Kohli తప్ప ఆ టైమ్‌లో ఎవరూ అలా ఆడలేరు: పాక్ మాజీ బౌలర్ ప్రశంసలు

దిశ, వెబ్‌డెస్క్: టీ20 వరల్డ్ కప్ 2022లో పాకిస్థాన్‌పై అద్భుతమైన ఇన్నింగ్స్ ఆడి భారత్‌కు చిరస్మరణీయ విజయాన్ని అందించిన టీమిండియా స్టార్ బ్యాటర్, రన్ మెషిన్ విరాట్ కోహ్లీపై పాక్ మాజీ పేసర్ అమీర్ ప్రశంసలు కురిపించాడు. ''తీవ్ర ఒత్తిడిలోను పాక్‌పై విరాట్ ఆడిన తీరు అద్భుతం. చాలా మంది విరాట్ కోహ్లీని ఇతర బ్యాట్స్‌మెన్లతో పోల్చుతారు. కానీ, అతడు స్పెషల్. తీవ్ర ఒత్తడి సమయంలోను పాక్‌పై విరాట్ కోహ్లీ ఆడిన విధంగా.. అతడు మాత్రమే ఆడగలడు. మరే బ్యాటర్ కోహ్లీలా ఆడలేరు. అంత ఒత్తిడిని తట్టుకునే బ్యాట్స్‌మెన్ ఎవరూ లేరు'' అంటూ అమీర్ విరాట్‌ను ఆకాశానికెత్తాడు. అయితే, విరాట్ కోహ్లీపై ఈ పాకిస్థాన్ మాజీ పేసర్ ఇలా ప్రశంసలు కురిపించడం ఇదే తొలిసారి కాదు. గతంలో కూడా అమీర్ ఎన్నోసార్లు విరాట్ పై ప్రశంసలు కురిపించాడు. గ్రౌండ్‌లో సైతం ఇద్దరు ఎదురుపడినప్పుడు మాట్లాడుకోవడం వంటివి చేస్తుంటారు.

ఇక, వరల్డ్ కప్ లీగ్ స్టేజ్‌లో భాగంగా దాయాది పాక్‌తో జరిగిన మ్యాచ్‌లో విరాట్ కోహ్లీ రెచ్చిపోయాడు. టాపార్డర్ విఫలమైన వేళ.. అద్భుత ఇన్నింగ్స్‌తో భారత్‌కు చిరస్మరణీయ విజయాన్ని అందించాడు. 53 బంతుల్లో 82 పరుగులు చేసిన కోహ్లీ చివరి వరకు క్రీజ్‌లో ఉండి భారత్‌ను విజయతీరాలకు చేర్చాడు. తీవ్ర ఒత్తిడిలోను పాక్‌పై కోహ్లీ ఆడిన ఇన్సింగ్స్‌కు ప్రశంసలు కురుస్తున్నాయి.