క్యాండిడేట్స్ చెస్ టోర్నీలో వరల్డ్ నం.3కి షాకిచ్చిన విదిత్

దిశ, స్పోర్ట్స్ : కెనడాలో జరుగుతున్న క్యాండిడేట్స్ చెస్ టోర్నీలో భారత గ్రాండ్‌మాస్టర్ విదిత్ గుజరాతి పుంజుకున్నాడు. రెండు రౌండ్‌ల తర్వాత 9వ రౌండ్‌లో విజయం సాధించాడు. వరల్డ్ నం.3, అమెరికా ఆటగాడు హికారు నకమురాకు అతను మరోసారి షాకిచ్చాడు. ఇప్పటికే 2వ రౌండ్‌లో అతన్ని ఓడించిన విదిత్ సోమవారం 9వ రౌండ్‌లోనూ చిత్తు చేశాడు. నల్లపావులతో ఆడిన విదిత్ 36 ఎత్తుల్లో నెగ్గాడు. ప్రజ్ఞానంద, గుకేశ్ మధ్య జరిగిన మరో గేమ్ డ్రాగా ముగిసింది. గుకేశ్ 5.5 పాయింట్లతో రష్యా ప్లేయర్ ఇయాన్ నెపోమ్నియాచ్చి‌తో కలిసి టాప్ ర్యాంక్‌‌లో కొనసాగుతున్నాడు. వరుసగా మూడు డ్రా పొందిన ప్రజ్ఞానంద(5.5) రెండో స్థానంలో ఉండగా.. విదిత్(4.5) మూడో స్థానానికి ఎగబాకాడు.

మరోవైపు, భారత అగ్రశ్రేణి క్రీడాకారిణి కోనేరు హంపి టోర్నీలో 6వ డ్రా చేసుకుంది. 9వ రౌండ్‌లో కాటెరినా లగ్నో(ఉక్రెయిన్)తో కలిసి 57 ఎత్తుల్లో పాయింట్లు పంచుకుంది. టోర్నీలో ఆర్.వైశాలి పేలవ ఫామ్ కొనసాగుతోంది. ఆమె వరుసగా 4వ ఓటమిని పొందింది. 9వ రౌండ్‌లో టాన్ ఝోంగి చేతిలో గేమ్‌ను కోల్పోయింది. ఈ టోర్నీలో చైనా క్రీడాకారిణి చేతిలో వైశాలికి ఇది ఓటమి. కోనేరు హంపి(4.0) నాలుగో స్థానంలో, వైశాలి(2.5) 6వ స్థానంలో ఉన్నారు.