యువతిని వేధించిన యాజమాని కొడుకు.. ఫోటోలు తీసి..

దిశ, చార్మినార్​ : ఇంట్లో పనికి కుదిరిన యువతిని ప్రేమ పేరుతో వేధిస్తుండడమే కాకుండా, ఫొటోలను తరచూ సదరు యువతికి షేర్​ చేస్తున్న ఇంటి యజమాని కుమారుడిని చాంద్రాయణగుట్ట పోలీసులు అదుపులోకి తీసుకుని రిమాండ్​కు తరలించారు. చాంద్రాయణగుట్ట పోలీసులు తెలిపిన వివరాల ప్రకారం .. చాంద్రాయణగుట్టకు చెందిన లక్ష్మి కూతురు (19) అదే బస్తీలో ఉన్న ఒక ఇంట్లో గత కొన్ని రోజులుగా పనిమనిషి గా పనిచేస్తుంది.

ఆ ఇంటి యజమాని కుమారుడు (23) ఆ యువతిని ప్రేమ పేరుతో వేధించేవాడు. సదరు యువతి ఇంట్లో పనిచేస్తునప్పుడు తెలియకుండా ఫోటో దించి, ఆ యువతి వాట్సాప్​ నెంబర్‌కే షేర్​ చేయసాగాడు. ఇటీవలే యువకుడి వేధింపులు భరించలేక యువతి ఆ ఇంట్లో పనిమనిషిగా విధులు మానేసింది. అయినప్పటికీ ఆ యువకుడు వేధిస్తుండడంతో చివరకు తల్లికి జరిగిన విషయాన్ని తెలియజేసింది.

కూతురు వాట్సాప్​ లో ఫొటోలు పరిశీలించిన లక్ష్మి చాంద్రాయణగుట్ట పోలీసులకు ఫిర్యాదు చేసింది. ఆమె ఇచ్చిన ఫిర్యాదు మేరకు చాంద్రాయణగుట్ట పోలీసులు కేసును నమోదు చేసుకుని యువకుని ఆరెస్ట్​ చేసి రిమాండ్​కు తరలించారు.