ఈ నెలాఖరు వరకూ ఉద్యోగుల విభజన.. ఆ నాలుగు శాఖలపైనే సాగదీత
దిశ, తెలంగాణ బ్యూరో: ఉద్యోగుల విభజన ప్రక్రియ ఇంకా కొనసాగుతోంది. సీఎస్ ప్రకటించిన షెడ్యూల్ ప్రకారం జిల్లాలు, జోన్లు, మల్టీజోన్ల వారీగా అలాట్మెంట్ ఆర్డర్లన్నీ ఈ నెల 20లోగా పూర్తి చేయాల్సి ఉంది. కానీ జోనల్ స్థాయిలో సమస్యలు ఉత్ఫన్నమవుతుండటం, నాలుగైదు శాఖల నుంచి ఆటంకాలు ఎదురవుతుండటంతో విభజన పూర్తి కావడం లేదు. ఈ నెలాఖరు వరకు ఉద్యోగుల విభజన కొనసాగుతుందని అధికార వర్గాలు వెల్లడిస్తున్నాయి. వివరాలు సరిగా లేవు నాలుగు ప్రధాన శాఖల నుంచి వివరాలు […]
దిశ, తెలంగాణ బ్యూరో: ఉద్యోగుల విభజన ప్రక్రియ ఇంకా కొనసాగుతోంది. సీఎస్ ప్రకటించిన షెడ్యూల్ ప్రకారం జిల్లాలు, జోన్లు, మల్టీజోన్ల వారీగా అలాట్మెంట్ ఆర్డర్లన్నీ ఈ నెల 20లోగా పూర్తి చేయాల్సి ఉంది. కానీ జోనల్ స్థాయిలో సమస్యలు ఉత్ఫన్నమవుతుండటం, నాలుగైదు శాఖల నుంచి ఆటంకాలు ఎదురవుతుండటంతో విభజన పూర్తి కావడం లేదు. ఈ నెలాఖరు వరకు ఉద్యోగుల విభజన కొనసాగుతుందని అధికార వర్గాలు వెల్లడిస్తున్నాయి.
వివరాలు సరిగా లేవు
నాలుగు ప్రధాన శాఖల నుంచి వివరాలు సరిగా లేకపోవడంతో ఆ ఫైళ్లను తిరిగి పంపుతున్నారు. రెవెన్యూ, ఇరిగేషన్, పోలీస్, వైద్యారోగ్య శాఖ నుంచి ఎక్కువగా ఇబ్బందులు వస్తున్నాయి. వైద్యారోగ్య శాఖలో వైద్య విద్య విభాగం, ప్రజారోగ్యం, కుటుంబ సంక్షేమం, వైద్య విధానపరిషత్, ఎన్హెచ్ఎం, టీఎస్ఎంఎస్ఐడీసీ, డ్రగ్ కంట్రోల్ అండ్ అడ్మినిస్ట్రేషన్ వంటి విభాగాలున్నాయి. వీటిల్లో పని చేస్తున్న వారి సీనియార్టీ అంశం గజిబిజిగా మారింది. ఈ సీనియార్టీని తేల్చడంలో ఉద్యోగుల ఆప్షన్ల ప్రక్రియలో కూడా చాలా తప్పులు దొర్లినట్లు గుర్తించారు. దీంతో ఈ శాఖకు సంబంధించిన ఉద్యోగుల ఫైళ్లు పదేపదే తిప్పి పంపిస్తున్నారు. సీఎస్ అనుకున్న ఫార్మాట్లో రాకపోవడంతో ఫైళ్లు తిరిగి వెళ్తున్నాయి. అదే విధంగా రెవెన్యూ, పోలీస్, ఇరిగేషన్ శాఖలో కూడా అదే పరిస్థితి నెలకొంది. వీటితో పాటుగా ఎక్సైజ్, కమర్షియల్ ట్యాక్స్, వ్యవసాయ శాఖ నుంచి కూడా సరైన విధంగా ఆప్షన్లు, వివరాలు రాకపోవడంతో వాటిపై సాగదీత కొనసాగుతోంది. దీంతో జోనల్ స్థాయి ఉద్యోగుల విభజన ఆలస్యమవుతోంది.
కాగా ఆయా శాఖల నుంచి వస్తున్న ఫైళ్లను మూడంచెల విధానంలో పరిశీలన చేస్తున్నారు. ముందుగా ఒక ఫార్మాట్ను కిందిస్థాయి నుంచే పంపిస్తున్నారు. ఆ తర్వాత సెకండ్ కేడర్ అధికారుల బృందం తనిఖీలు చేయాలని సోమవారం నుంచి సూచించారు. ఇక్కడ నుంచి ఆయా శాఖల హెచ్ఓడీలు వాటిని పరిశీలించి తుది రిపోర్ట్ను సిద్ధం చేసి కేటాయింపుల ప్రక్రియను చేపట్టుతున్నారు. అయితే ప్రతి శాఖకు సంబంధించిన ఫైళ్లను సీఎస్ తనిఖీ చేస్తుండటంతో ఆటంకాలు ఎదురవుతూనే ఉన్నాయి. ఈ జోనల్, మల్టీజోనల్ కేటాయింపుల ప్రక్రియ మరో నాలుగైదు రోజులు సాగే అవకాశాలున్నట్లు అధికారులు చెప్పుతున్నారు. కాగా మంగళవారం రాత్రి ఫైలట్గా మూడు శాఖలకు సంబంధించిన ఉద్యోగులకు జోనల్ కేటాయింపులు చేసినట్లు తెలుస్తోంది. దీనిపై ఏమైనా అభ్యంతరాలు వస్తే మళ్లీ వాటిని పరిగణలోకి తీసుకుని పరిష్కరించనున్నారు.