196 పరుగులు చేసిన ఢిల్లీ

దిశ, వెబ్‌డెస్క్: టాస్ ఓడి బ్యాటింగ్‌కు దిగిన ఢిల్లీ క్యాపిటల్స్ మంచి ఇన్నింగ్స్‌ ఆడింది. కెప్టెన్ శ్రేయాస్ అయ్యర్ బ్యాటింగ్‌లో విఫలమైనా.. మిగతా ఆటగాళ్లు సమిష్ఠిగా రాణించి 196 పరుగులు చేశారు. మొత్తం నిర్ధిష్ఠ 20 ఓవర్లలో ఢిల్లీ క్యాపిటల్స్ 4 వికెట్ల నష్టానికి 196 పరుగులు చేసింది.

ఇన్నింగ్స్ సాగిందిలా…

ఓపెనర్లు పృథ్వీ షా-శిఖర్ ధావన్ క్రీజులో ఉన్నంత సేపు పరుగుల వరద పారించారు. తొలి పవర్ ప్లే ముగిసే సరికి కరెంట్ స్ట్రైక్ రేట్ 10.5తో 63 పరుగులు చేశారు. ముఖ్యంగా పృథ్వీ షా 23 బంతుల్లోనే 5 ఫోర్లు 2 సిక్సర్లతో 42 పరుగులు చేశాడు. ఆ తర్వాత 7వ ఓవర్‌లో సిరాజ్ వేసిన బంతిని కొట్టబోయి కీపర్ డివిలియర్స్‌కు క్యాచ్ ఇచ్చాడు. అప్పటికే క్రీజులో ఉన్న శిఖర్ ధావన్-వన్‌డౌన్‌లో వచ్చిన శ్రేయాస్ అయ్యార్‌లు ఎక్కువ సేపు క్రీజులో నిలబడలేదు.

10వ ఓవర్‌లో శిఖర్ ధావన్ ఉదాన వేసిన బంతికి షాట్ ఆడబోయి మొయిన్ అలీకి క్యాచ్ ఇచ్చాడు. మొత్తం 28 బంతుల్లో 3 ఫోర్లు కొట్టిన శిఖర్ 32 పరుగులు చేసి పెవిలియన్ చేరాడు. ఇక మిడిలార్డర్‌లో వచ్చిన రిషబ్ పంత్ బ్యాట్‌కు పని చేప్పే సమయంలో కెప్టెన్ శ్రేయాస్ అయ్యార్ 11 పరుగులు మాత్రమే చేసి 90 స్కోర్ బోర్డు వద్ద చేతులెత్తేశాడు. మిడిలార్డర్లు పంత్-స్టోయినిస్ జట్టు భారాన్ని మీదేసుకొని మంచి ఇన్నింగ్స్ ఆడారు. రిషబ్ పంత్ 25 బంతుల్లో 3 ఫోర్లు, 2 సిక్సర్లు బాది 37 పరుగులు చేసి 179 స్కోరు బోర్డు వద్ద పెవిలియన్ చేరాడు.

ఇక స్టోయినిస్ మాత్రం ముందు నుంచే బ్యాటింగ్ పరంపర కొనసాగిస్తూ.. బౌండరీల మోత మోగించాడు. కేవలం 26 బంతులను ఫేస్ చేసి 6 ఫోర్లు, 2 సిక్సర్లు బాదాడు. హాఫ్ సెంచరీ (53) పూర్తి చేసుకొని నాటౌట్‌గా నిలిచాడు. పంత్‌ తర్వాత వచ్చిన హెట్మేయర్ 7 బంతుల్లో 11 పరుగులు చేసి నాటౌట్‌గానే నిలబడ్డాడు. దీంతో 4 వికెట్ల నష్టానికి నిర్ధిష్ఠ 20 ఓవర్లలో ఢిల్లీ క్యాపిటల్స్ జట్టు 196 పరుగులు చేయగలిగింది. ఇక 197 భారీ లక్ష్యంతో బరిలోకి దిగిన ఆర్సీబీ ఏ విధంగా రాణిస్తుందో వేచిచూడాల్సిందే.

స్కోరు బోర్డు:

Delhi Capitals Innings: పృథ్వీ షా c ఏబీ డివిలియర్స్ b సిరాజ్ 42(23), శిఖర్ ధావన్ c మొయిన్ అలీ b ఇసురు ఉదాన 32(28), శ్రేయాస్ అయ్యార్ (c)c దేవదత్ పడిక్కల్ b మొయిన్ అలీ 11(13), రిషబ్ పంత్ (wk)b సిరాజ్ 37(25, మార్క్యూస్ స్టోయినిస్ నాటౌట్53(26), హెట్మేయర్ నాటౌట్ 11(7), ఎక్స్‌ట్రాలు 10 మొత్తం స్కోరు: 196/4

వికెట్ల పతనం: 68-1 (పృథ్వీ షా , 6.4), 82-2 (శిఖర్ ధావన్, 9.4), 90-3 (శ్రేయాస్ అయ్యార్, 11.3), 179-4 ( రిషబ్ పంత్, 18.2).

బౌలింగ్: ఇసురు ఉదాన 4-0-40-1, వాషింగ్టన్ సుందర్ 4-0-20-0, నవదీస్ సైని 3-0-48-0, యూజువేంద్ర చాహల్ 3-0-29-0, మహ్మద్ సిరాజ్ 4-0-34-2, మొయిన్ అలీ 2-0-21-1.