రిటైర్డ్ జవాన్ అరెస్ట్…

భారత సైన్యంలో పనిచేసి రిటైర్డ్ అయిన మాజీ ఆర్మీ జవాన్‌ను పోలీసులు అరెస్ట్ చేశారు. ఈ ఘటన పెద్దపల్లి జిల్లా ధర్మారం మండలం శాయంపేట గ్రామంలో జరిగింది. గ్రామానికి చెందిన బద్దం తిరుమల్‌రెడ్డి అనే రిటైర్డ్ జవాను తన వద్ద తుపాకీతో గాల్లోకి కాల్పులు జరిపిన దృశ్యాలు సామాజిక మాధ్యమాల్లో చక్కర్లు కొట్టడంతో ఆయనను అదుపులోకి తీసుకున్నట్టు పోలీసులు వెల్లడించారు. 2002 నుంచి 2019 వరకు ఆర్మీలో పనిచేసి రిటైరైన తిరుమల్‌‌రెడ్డి డీబిబిఎల్ అనే లైసెన్స్డ్ వెపన్, 20 బుల్లెట్లను కలిగి వున్నాడు. 2019 డిసెంబర్ 31 రాత్రి శాయంపేటలో సరదాగా ఫ్రెండ్స్‌తో కలిసి ఓపెన్ ఫైరింగ్‌కు పాల్పడ్డాడు. గాల్లోకి కాల్పులు జరిపిన దృశ్యాలను స్థానిక గ్రామస్తులు తమ మొబైల్స్‌లో చిత్రీకరించారు. తాజాగా ఈనెల 13న గ్రామంలో జరిగిన ఒక వివాహ వేడుకలో గొడవ జరగగా ఆ సమయంలో కూడా తిరుమల్‌రెడ్డి గాల్లోకి కాల్పులు జరిపాడు. ఈ వీడియోలు, పాత వీడియోలు సామాజిక మాధ్యమాల్లో వైరల్ అయ్యాయి. దీంతో స్పందించిన పెద్దపల్లి డీసీపీ రవీందర్, ఏసీపీ హాబీబ్ ఖాన్, సీఐ ప్రదీప్ కుమార్, ఎస్సై ప్రేమ్‌కుమార్ అతన్ని అదుపులోకి తీసుకొని విచారిస్తున్నారు. తిరుమల్ రెడ్డి నుంచి డీబీబీఎల్ వెపన్, 10 రౌండ్ల బుల్లెట్లను పోలీసులు స్వాధీనం చేసుకున్నారు.