దిశ, వెబ్‌డెస్క్ : భారీ వర్షాలు హిమాచల్ ప్రదేశ్‌ను మరోసారి వణికిస్తున్నాయి. గత కొన్ని రోజులుగా హిమాచల్‌లో భారీ వర్షాలు కురుస్తూనే ఉన్నాయి. రాష్ట్రంలో ఇప్పటికే ఆరెంజ్ అలెర్ట్ జారీ చేసి వాతావరణ శాఖ హెచ్చరించింది. అయితే, సోమవారం ఉదయం నుంచి హిమాచల్‌లో ధర్శశాలలో కుంభవృష్టి కురుస్తోంది. భారీ వర్షాల కారణంగా వరద ఏరులై పారుతోంది. ఆకస్మిక వరదల కారణంగా నీటి ప్రవాహానికి వీధుల్లోని కార్లు కొట్టుకుపోయాయి. కొన్ని ప్రాంతాల్లో ఇళ్లు, హోటళ్లు పూర్తిగా ధ్వంసం అయ్యాయి. ప్రధాన నదుల్లో నీటిమట్టాలు పెరుగుతున్నాయి. ఏ సమయంలో ఎటువంటి ప్రమాదం ముంచుకొస్తుందోనని ప్రజలు ఆందోళన చెందుతున్నారు.