కింగ్ ఆఫ్ రొమాన్స్ షారుక్ : పూజా హెగ్డే

దిశ, వెబ్‌డెస్క్: పూజా హెగ్డే కాలం నడుస్తోందిప్పుడు. హీరోలు, డైరెక్టర్లు పూజానే హీరోయిన్‌గా కావాలని కోరుకుంటున్నారు. ఆమె సినిమాలో ఉంటే చాలు సూపర్ హిట్ అని కన్‌ఫాం అయిపోతున్నారు.. దీంతో అటు బాలీవుడ్, ఇటు టాలీవుడ్‌లో పూజా తన హవా నడిపిస్తుంది. తెలుగులో ప్రభాస్ ‘ఓ డియర్’, అఖిల్ ‘మోస్ట్ ఎలిజబుల్ బ్యాచులర్’ సినిమాలు చేస్తున్న అమ్మడు… హిందీలో ఏకంగా సల్మాన్ ఖాన్ సరసన చాన్స్ కొట్టేసింది. కరోనా ఎఫెక్ట్‌తో సినిమా షూటింగ్‌లన్నీ వాయిదా పడగా… ప్రస్తుతం క్వారెంటైన్‌లో ఉంది పూజా. ఈ సమయంలో అభిమానుల కోరిక మేరకు కాసేపు చాట్ చేసింది.

ఈ కొంత సమయంలోనే తన గురించి చాలా విషయాలు చెప్పింది పూజా. తనకు ఇష్టమైన హీరో షారుక్ ఖాన్ అని… ఆయనను కింగ్ ఆఫ్ రొమాన్స్‌గా అభివర్ణించింది. తెరపై రొమాన్స్ చేయడంలో షారుక్‌కు ఎవరు సాటిరారని అభిప్రాయపడింది. నేచురల్ స్టార్ నాని బ్రిలియంట్ యాక్టర్ అని తెలిపిన పూజా… హృతిక్ రోషన్ హ్యాండ్సమ్‌గా ఉండడమే కాదు తన మనసు కూడా చాలా అందమైనదని చెప్పింది. ఫేవరేట్ మ్యూజిక్ డైరెక్టర్, సింగర్ ఏఆర్ రహమాన్ అని … తన పాటలు వింటూ మైమరిచిపోతానని తెలిపింది. ప్రెజెంట్ ఫేవరేట్ సాంగ్ ‘మోస్ట్ ఎలిజబుల్ బ్యాచులర్ ‘ సినిమాలో సిద్ శ్రీరామ్ పాడిన ‘మనసా మనసా మనసారా బతిమాలా’ పాట అని చెప్పింది. ఇక ‘ముకుంద’ సినిమాలో ‘గోపికమ్మా చాలును లేమ్మా నీ నిదుర’ సాంగ్ చేశాక చాలా మంది గోపికమ్మ అని పిలవడం మొదలెట్టారని చెప్పింది. ఇప్పటికీ అలాగే పిలవడం కాస్త గర్వంగానే ఉందంది. ఈ పాట ద్వారా కెరియర్‌లో త్వరగా సోలో సాంగ్ చేసే చాన్స్ వచ్చిందని ఆనందం వ్యక్తం చేసింది పూజ. యాక్టింగ్ అనేది రెగ్యులర్ జాబ్ కాదని… ప్రతీ రోజు చాలా కొత్తగా, ఎగ్జైటింగ్‌గా ఉంటుందని చెప్పిన పూజా… కానీ అంత ఈజీ మాత్రం కాదంది. చిన్నప్పుడు శాంటా క్లాజ్‌ను ఎక్కువగా నమ్మేదాన్నని… నా కోరికలు తెలుపుతూ చాలా లెటర్స్ కూడా రాశానని తెలిపింది.

Tags: Pooj Hegde, Ask Pooja, Sharuk Khan, Tollywood, Bollywood