పెర్త్‌లో యాషెస్ ఫైనల్ టెస్ట్

దిశ, స్పోర్ట్స్ : ఇంగ్లాండ్-ఆస్ట్రేలియా మధ్య జరిగే యాషెస్ టెస్ట్ సిరీస్‌లో కొన్ని మార్పులు జరుగనున్నట్లు తెలుస్తున్నది. డిసెంబర్ 9 నుంచి యాషెస్ సిరీస్ ప్రారంభం కానుండగా 1995 తర్వాత తొలి సారిగా చివరి టెస్టు సిడ్నీలో కాకుండా పెర్త్‌లో నిర్వహించాలని క్రికెట్ ఆస్ట్రేలియా నిర్ణయించినట్లు ది ఏజ్ అనే పత్రిక వెల్లడించింది. 5 మ్యాచ్‌ల టెస్టు సిరీస్‌కు వరుసగా బ్రిస్బేన్, అడిలైడ్, మెల్‌బోర్న్, సిడ్నీ, పెర్త్ నగరాలు ఆతిథ్యం ఇవ్వనున్నట్లు సమాచారం. కాగా, అడిలైడ్‌లో జరిగే రెండో టెస్టు పింక్ బాల్ (డే/నైట్) గా నిర్వహించనున్నారు. మెల్‌బోర్న్‌లో బాక్సింగ్ డే టెస్టు, జనవరి 5న సిడ్నీలో న్యూ ఇయర్ టెస్టు జరుగనున్నది. కాగా, యాషెస్ కంటే ముందు ఆస్ట్రేలియా జట్టు ఆఫ్గనిస్తాన్‌తో ఏకైక టెస్టు ఆడనున్నది. కాగా, క్రికెట్ ఆస్ట్రేలియా అధికారికంగా ఈ షెడ్యూల్ ప్రకటించాల్సి ఉన్నది.