దారుణం.. కొండచరియలు విరిగిపడి ఏడుగురు మృతి

దిశ, వెబ్ డెస్క్: వాహనాలు ప్రయాణిస్తున్న రోడ్డుపై భారీ కొండచరియలు విరిగిపడి ఏడుగురు మృతి చెందారు. ఈ విషాద సంఘటన కర్ణాటకలోని ఉత్తర కన్నడ జిల్లా అంకోలా-శిరాలీ రోడ్డుపై చోటు చేసుకుంది. గత రెండు రోజులుగా కురుస్తున్న భారీ వర్షాలకు ఈ ప్రమాదం చోటు చేసుకున్నట్లు తెలుస్తోంది. కొండచరియలు విరిగి రోడ్డు పక్కనే ఉన్న ఓ హోటల్ పై పడటంతో ఈ ప్రమాదం చోటు చేసుకున్నట్లు స్థానికులు తెలిపారు. దాదాపు పదిమంది హోటల్ లో కొండచరియలు కింద చిక్కుకున్నారని.. వారిలో ఇప్పటికే ఏడుగురి మృతదేహాలను బయటకు తీసినట్లు తెలిపారు. మృతుల్లో ఒకే కుటుంబానికి చెందిన ఐదుగురు ఉన్నారని వారు భోజనం కోసం హోటల్ లో ఉండగా ఈ ప్రమాదం చోటు చేసుకుంది. కాగా ఈ ప్రమాదంలో మృతుల సంఖ్య పెరిగే అవకాశం ఉన్నట్లు స్థానిక అధికారులు తెలుపుతుండగా.. కొండచరియలు తీసివేసేందుకు సహాయక చర్యలు కొనసాగిస్తున్నారు.