ఇటలీలో రెచ్చిపోయిన ఖలిస్థానీ వేర్పాటువాదులు.. మహాత్మా గాంధీ విగ్రహం ధ్వంసం

దిశ, నేషనల్ బ్యూరో: ఇటలీలో ఖలిస్థానీ వేర్పాటువాదులు రెచ్చిపోయారు. మహాత్మా గాంధీ విగ్రహాన్ని ఖలిస్థానీ మద్దతుదారులు ధ్వంసం చేశారు. మహాత్మా గాంధీ విగ్రహం కింది భాగంలో హర్దీప్ సింగ్ నిజ్జర్ కు సంబంధించిన వివాదాస్పద నినాదాలు రాశారు. జూన్ 14న ఇటలీలో జీ7 సదస్సు జరగనుంది. ఈ సదస్సులో ప్రధాని మోడీ పాల్గొననున్నారు. కాగా.. ప్రధాని పర్యటనకు ముందు గాంధీ విగ్రహాన్ని ధ్వంసం చేయడం కలకలం రేపింది.

స్పందించిన ఇటలీ ప్రభుత్వం

ఈ ఘటనపై విదేశీ వ్యవహారాల మంత్రిత్వ శాఖ స్పందించింది. గాంధీ విగ్రహాన్ని ధ్వంసం చేసిన విషయాన్ని ఇటలీ అధికారుల ఎదుట భారత్ లేవనెత్తిందని విదేశాంగ కార్యదర్శి క్వాత్రా తెలిపారు. విగ్రహానికి ఇటలీ ప్రభుత్వం మరమ్మతులు చేసినట్లు వెల్లడించారు. మరోవైపు, ఘటన తర్వాత ఆ ప్రాంతాన్ని అత్యంత తక్కువ సమయంలోనే క్లీన్ చేసినట్లు స్థానిక అధికారులు తెలిపారు. గతేడాది ఇదే తరహాలో కెనడాలో గాంధీ విగ్రహం ధ్వంసం అయ్యింది. బ్రిటిష్ కొలంబియా ప్రావిన్స్‌లో యూనివర్సిటీ క్యాంపస్‌లో మహాత్మా గాంధీ విగ్రహాన్ని ఖలిస్థాన్ తీవ్రవాదులు ధ్వంసం చేశారు.