డోంట్ వర్రీ.. ‘ఇండియా’ కూటమిపై నితీశ్ కీలక కామెంట్

దిశ, నేషనల్ బ్యూరో : విపక్ష కూటమి ఇండియాలో సీట్ల పంపకాల చర్చలపై బిహార్ ముఖ్యమంత్రి నితీష్ కుమార్ కీలక వ్యాఖ్యలు చేశారు. కంగారుపడాల్సిన పనేం లేదని.. అంతా అనుకున్న టైంలో పూర్తి చేస్తామని వెల్లడించారు. బీజేపీని ఎదుర్కొనేందుకు ఇండియా కూటమిలోని పార్టీలన్నీ సర్వశక్తులు ఒడ్డుతాయని తేల్చి చెప్పారు. దేశంలో ప్రస్తుతం బీజేపీకి వ్యతిరేక పవనాలు వీస్తున్నాయని వ్యాఖ్యానించారు. ఇండియా కూటమిలోని పార్టీల మధ్య సీట్ల పంపకాలపై గత కొన్ని రోజులుగా చర్చలు జరుగుతున్న తరుణంలో నితీష్ చేసిన వ్యాఖ్యలు ప్రాధాన్యాన్ని సంతరించుకున్నాయి. నితీష్‌కు చెందిన జేడీయూ, లాలూ ప్రసాద్ యాదవ్‌కు చెందిన ఆర్జేడీ ప్రతినిధులు ఇటీవల ఢిల్లీలో కాంగ్రెస్ సీనియర్ నేత ముకుల్ వాస్నిక్‌తో భేటీ అయి సీట్ల పంపకాలపై చర్చించారు. కాగా, త్వరలోనే ఇండియా కూటమి కన్వీనర్‌గా నితీష్ పేరును అనౌన్స్ చేస్తారనే వార్తలు వినవస్తున్నాయి.