Actress Kasturi: అజ్ఞాతంలో నటి కస్తూరి.. ఫోన్ స్విచ్చాఫ్, ఇంటికి తాళం
తెలుగువారిపై అనుచిత వ్యాఖ్యలు చేసిన నటి కస్తూరిపై చెన్నైలో కేసులు నమోదయ్యాయి. ఆమెకు సమన్లు జారీ చేసేందుకు పోలీసులు ఇంటికెళ్లగా.. ఆమె అక్కడా లేకపోవడంతో అజ్ఞాతంలోకి వెళ్లిందన్న వార్తలకు ఊతమొచ్చింది.
దిశ, వెబ్ డెస్క్: కొద్దిరోజుల క్రితం తెలుగువారిపై నటి కస్తూరి చేసిన వ్యాఖ్యలు వివాదాస్పదమైన విషయం తెలిసిందే. ఓ రాజకీయ సభలో ఆమె తెలుగు వారిని కించపరుస్తూ మాట్లాడటంపై తెలుగు సంఘాలు భగ్గుమన్నాయి. ఆ తర్వాత తాను అలాంటి ఉద్దేశంతో అనలేదని సర్దిచెప్పే ప్రయత్నం చేసినా.. ఫలితం లేకపోయింది. మూడు రోజుల క్రితం కస్తూరిపై చెన్నైలో కేసులు నమోదవ్వగా.. ఆమెకు సమన్లు జారీ చేసేందుకు పోలీసులు ఇంటికెళ్లారు. ఆమె ఇంటికి తాళం వేసి ఉండటంతో ఫోన్ చేశారు. ఫోన్ కూడా స్విచ్ఛాఫ్ వచ్చింది. దీంతో నటి కస్తూరి అజ్ఞాతంలోకి వెళ్లారన్న టాక్ బయటికొచ్చింది. ప్రస్తుతం ఆమె ఎక్కడుందన్న దానిపై స్పష్టమైన సమాచారం లేదు.
అన్నమయ్య సినిమాతో తెలుగు ప్రేక్షకులకు పరిచయమైన కస్తూరి.. ఆ తర్వాత పలు సినిమాల్లోనూ నటించింది. ఇటీవలే ఓ తెలుగు సీరియల్ లోనూ లీడ్ రోల్ లో నటించి.. మంచి గుర్తింపు పొందింది. తెలుగులో అవకాశాలు పొందుతూ.. తెలుగు వారిపై అనుచిత వ్యాఖ్యలు చేయడాన్ని తప్పుపట్టారు. తమిళనాడులో అంతఃపుర మహిళలకు సేవ చేసేందుకు తెలుగు వారు వచ్చేవారని ఆమె చేసిన వ్యాఖ్యలు తీవ్రదుమారం రేపాయి.