అద్భుతమైన పాలరాతి కట్టడం.. తాజ్ మహల్ కాదు.. ఇంతకీ ఏంటంటే?

దిశ, నేషనల్ బ్యూరో: ఆగ్రాలోని ప్రఖ్యాత తాజ్ మహల్ కట్టడానికి పోటీగా మరో కట్టడం వచ్చి చేరింది. రాధాస్వామి ఆధ్యాత్మిక సంప్రదంలో నడిచిన శివ్ దయాళ్ సింగ్ పాలరాతి సమాధి చూపరులను ఆకట్టుకుంటోంది. తాజ్ మహల్ కు 12 కిలోమీటర్ల దూరంలోని స్వామి బాగ్ కాలనీలో ఈ సమాధి ఉంది. దీన్ని నిర్మించేందుకు వందేళ్లకు పైగా కష్టపడ్డారు.

1904లో శివ్ దయాళ్ సింగ్ సమాధి నిర్మాణపనులు ప్రారంభం అయ్యాయి. ఆ తర్వాత అనివార్య కారణాల వల్ల అవి నిలిచిపోయాయి. 1922లో ఆ నిర్మాణాన్ని తిరిగి ప్రారంభించారు. ప్రస్తుతం ఆ పనులు చివరి దశకు చేరుకున్నాయి. ప్రస్తుతం ఆ నిర్మణానికి తుది మెరుగులు దిద్దుతున్నారు. శివ్ దయాళ్ సింగ్ సమాధిని చూసేందుకు ఆధ్యాత్మిక పర్యటకులు వెల్లువెత్తుతున్నారు. అయితే, ఈ కట్టడానికి.. తాజ్ మహల్ కు ఎలాంటి సంబంధం లేదని తెలుస్తోంది. రాజస్థాన్ లోని మక్రానా, జోథ్ పూర్ ప్రాంతాల నుంచి పాలరాతిని తీసుకొచ్చి ఈ నిర్మాణాన్ని చేపడుతున్నారు. దాదాపు 193 అడుగుల ఎత్తులో ఈ అందమైన కట్టడాన్ని నిర్మించారు.