కోతులకు అక్షయ్ కుమార్ దీపావళి బహుమతి

దిశ, వెబ్ డెస్క్ : దీపావళి(Diwali) పండగ సందర్భంగా బాలీవుడ్ నటుడు అక్షయ్ కుమార్(Akshay Kumar) కోతులకు(Monkeys) బహుమతి అందించారు. అయోధ్య(Ayodhya) రామమందిరం చుట్టూ ఉండే కోతులకు ఆహారాన్ని పంపిణీ చేశారు. ప్రత్యేకంగా తయారు చేయబడిన ఫీడింగ్ వ్యాన్లో భారీ మొత్తంలో ఆహార పదార్థాలను అక్షయ్ పంపించారు. పవిత్ర అయోధ్యలో ఆహారం కోసం కోతులు ఎదుర్కొంటున్న సమస్యలు విని గుండె బరువెక్కిందని తెలిపిన అక్షయ్.. దీపావళి పండగ సందర్బంగా తన తల్లిదండ్రులకు నివాళులు అర్పిస్తూ ఈ కార్యక్రమాన్ని చేపట్టారు. దాదాపు 1200కు పైగా కోతులకు ఆహారం అందిచే ఏర్పాటు చేశానని తెలిపారు. తన తల్లిదండ్రులు ఎక్కడున్నా దీన్ని చూసి సంతోషిస్తారని తెలిపాడు. అక్షయ్ చేపట్టిన ఈ కార్యక్రమాన్ని అయోధ్య పీఠాధిపతి స్వామి రాఘవాచార్య ప్రశంసించారు. ఆ బాలరాముని ఆశీస్సులు ఎల్లప్పుడూ అక్షయ్ కి ఉండాలని దీవించారు.