బ్యారేజీ గేట్లను మూసివేసిన హర్యానా ప్రభుత్వం: మంత్రి అతిషి

దిశ, నేషనల్ బ్యూరో: దేశరాజధానికి రావాల్సిన నీటి వాటాను హర్యానా ప్రభుత్వం విడుదల చేయడం లేదని ఆరోపిస్తున్న ఆప్ మంత్రి అతిషి తాజాగా మరోసారి ఆ రాష్ట్ర ప్రభుత్వంపై విమర్శలు చేశారు. ఢిల్లీకి నీటిని విడుదల చేసేందుకు ఉపయోగించే హత్నీకుండ్ బ్యారేజీ గేట్లను హర్యానా ప్రభుత్వం మూసివేసిందని ఆమె ఆదివారం ఆరోపించారు. ఢిల్లీకి నీళ్లివ్వాలని అతిషి చేపట్టిన నిరవధిక నిరాహార దీక్ష మూడో రోజుకు చేరుకుంది. ఈ సందర్బంగా మాట్లాడిన ఆమె, నేను ఢిల్లీ నీటి వాటా కోసం నిరాహార దీక్ష చేస్తున్నాను. హర్యానా ప్రభుత్వం 100 MGD నీటిని తక్కువగా విడుదల చేస్తోంది, దీని వలన ఢిల్లీలోని దాదాపు 28 లక్షల మంది ప్రజలు నీటిని కోల్పోతున్నారు. కొంతమంది పాత్రికేయులు చెప్పారు. హత్నికుండ్ బ్యారేజీ పూర్తిగా నీటితో నిండి ఉంది, కానీ హర్యానా ప్రభుత్వం ఆ నీటిని దేశ రాజధానికి చేరకుండా ఆపడానికి అన్ని గేట్లను మూసివేసిందని అన్నారు. ఢిల్లీకి నీటిని విడుదల చేయాలని హర్యానా ప్రభుత్వాన్ని కోరాము, నీటి విడుదల జరిగే వరకు నిరవధిక నిరాహార దీక్ష కొనసాగిస్తామని అతిషి చెప్పారు.

ఢిల్లీకి రోజూ సరఫరా చేసే 1,005 ఎంజీడీల నీటిలో, నగరానికి హర్యానా నుంచి 613 ఎంజీడీలు రావాల్సి ఉండగా, హర్యానా నుంచి దేశ రాజధానికి 513 ఎంజీడీల కంటే తక్కువ నీరు వస్తుందని మంత్రి అతిషి పేర్కొన్నారు. మరోవైపు ఢిల్లీలో నీటి కొరతకు కారణం ఆప్‌ పార్టీ బాధ్యతరాహిత్యమే అని భారతీయ జనతా పార్టీ ఆరోపిస్తోంది. హర్యానా ప్రభుత్వం ఢిల్లీకి సరిపడా నీటిని విడుదల చేస్తుందని, ప్రభుత్వం వైఫల్యం కారణంగానే నగరంలో ప్రజలు తీవ్ర ఇబ్బందులు పడుతున్నారని బీజేపీ నాయకులు పేర్కొన్నారు.