తీర్థయాత్రలకు వెళ్లివస్తూ అనంతలోకాలకు.. 13 మంది మృతి

దిశ, నేషనల్ బ్యూరో: కర్ణాటకలోని హవేరి జిల్లాలో ఘోర రోడ్డు ప్రమాదం జరిగింది. 13 మంది మృతి చెందగా.. మరో నలుగురికి తీవ్ర గాయాలయ్యాయయి. పూణే- బెంగళూరు హైవేపై ఆగి ఉన్న ఓ లారీని టెంపో వెనక నుంచి ఢీకొట్టింది. దీంతో, 11 మంది స్పాట్ డెడ్ కాగా.. మరో ఇద్దరు ఆస్పత్రిలో చికిత్స పొందుతూ చనిపోయారు. 17 మందితో ఉన్న టెంపో శుక్రవారం తెల్లవారుజామున 3.45 నిమిషాలకు గుండెనహళ్లిలో లారీని ఢీకొట్టిందని అధికారులు తెలిపారు. సమాచారం అందుకున్న పోలీసులు హుటాహుటిన ప్రమాద స్థలానికి చేరుకుని సహాయక చర్యలు చేపట్టారు. క్షతగాత్రులను ఆస్పత్రికి తరలించారు. వారిలో మరో ఇద్దరి పరిస్థితి విషమంగా ఉందని అధికారులు తెలిపారు. ప్రమాదానికి గల కారణం తెలియాల్సి ఉందన్నారు. డ్రైవర్ నిద్రమత్తే ప్రమాదానికి కారణం అని భావిస్తున్నమని తెలిపారు. కాగా.. మృతులందరూ శివమొగ్గ వాసులుగా గుర్తించామన్నారు. బెలగావి జిల్లాలోని పలు ఆలయాల దర్శనానికి వెళ్లి వస్తుండగా ఈ ప్రమాదం జరిగిందన్నారు.