పవన్ కల్యాణ్‌కు మేమంతా ఉన్నాం.. మద్దతు ప్రకటించిన సీనియర్ హీరోయిన్ (వీడియో)

దిశ, వెబ్‌డెస్క్: ఎన్నికలు సమీపిస్తోన్న వేళ సినిమాలకు పూర్తి దూరంగా ఉంటూ పవన్ కల్యాణ్ రాజకీయాల్లో వేగం పెంచారు. రెండు నెలల క్రితం వరకు సినిమా షూటింగుల్లో పాల్గొంటూనే పాలిటిక్స్‌ కూడా చేశారు. కానీ, ఇప్పుడు అన్ని పార్టీలు దూకుడు ప్రదర్శిస్తుండటంతో ఆయన కూడా రంగంలోకి దిగారు. ప్రస్తుతం తెలుగుదేశం పార్టీతో పొత్తు పెట్టుకొని ఎన్నికల బరిలోకి దిగుతున్నారు. ఇప్పటికే కూటమిలో భాగంగా తొలి జాబితా సైతం విడుదల చేశారు. ఇందులో జనసేన పార్టీకి 24 సీట్లు దక్కాయి. రెండో జాబితాలోనూ మరిన్ని సీట్లు వచ్చే అవకాశం ఉందని వార్తలు వినిపిస్తున్నాయి. ఇదిలా ఉండగా.. అనూహ్యంగా ఇండస్ట్రీ నుంచి మద్దతు లభించింది. ప్రముఖ సీనియర్ హీరోయిన్ జయసుధ పవన్ కల్యాణ్‌ మేమంతా ఉన్నామని భరోసా ఇచ్చారు.

ఇటీవల ఆమె మీడియా ఛానల్‌కు ఇచ్చిన ఇంటర్వ్యూలో భాగంగా ఆమె పవన్ కల్యాణ్ రాజకీయ జీవితంపై మాట్లాడారు. ‘పవన్ కల్యాణ్ గొప్ప హీరో. చిరంజీవి తమ్ముడిగా కెరీర్ ప్రారంభించినా తనకంటూ ప్రత్యేకమైన స్టైల్, గుర్తింపు తెచ్చుకున్నారు. ఆయన్ను రాబోయే ఎన్నికల్లో గెలిపించుకోవాల్సిన బాధ్యత అందరిపైనా ఉంది. మేమంతా డైరెక్ట్‌గా రోడ్డుమీదకు వచ్చేసి ఓట్లు వేయాలని ప్రచారం నిర్వహించలేకపోయినా.. మా మద్దతు ఆయనకు ఉంటుంది. స్వలాభం కోసం పవన్ రాజకీయాల్లోకి రాలేదు. డబ్బులు సంపాదించాలంటే అతనే సినిమాల్లో టాప్ హీరో. కానీ, తను ప్రజల కోసం రాజకీయాల్లోకి వచ్చాడు’ అని జయసుధ చెప్పుకొచ్చారు. ప్రస్తుతం ఈ వీడియో సోషల్ మీడియాలో వైరల్‌గా మారింది.