Raj Tarun: సైలెంట్‌ టు వైలెంట్‌.. రాజ్ తరుణ్ పాత్ర అందర్ని ఆకట్టుకుంటుంది: నిర్మాత

దిశ, సినిమా: 'నటుడు స్వర్గీయ శ్రీహరి 'భద్రాది' ద్వారా సినీ పరిశ్రమలోకి నిర్మాతగా అడుగుపెట్టాను. సినిమా అంటే ఇష్టంతో వచ్చాను. ఇప్పటి వరకు పలుచిత్రాలు నిర్మించిన నిర్మాతగా ఇక్కడ సంపాందించింది ఏమీ లేదు. అయితే నలుగురికి ఉపాధి ఇచ్చే పరిశ్రమ ఇది. సినిమా విజయం సాధిస్తే ఎంతో మంది జీవితాలకు వెలుగు వస్తుంది' అన్నారు నిర్మాత మల్కాపురం శివకుమార్‌. ఆయన నిర్మించిన తాజా చిత్రం 'తిరగబడరా సామీ'. రాజ్‌ తరుణ్‌, మాల్వి మల్హోత్రా జంటగా నటించిన ఈ చిత్రం ఆగస్ట్‌ 2న ప్రేక్షకుల ముందుకు రానుంది. ఈ నేపథ్యంలో నిర్మాత మల్కాపురం శివకుమార్‌ మీడియాతో మాట్లాడారు.

చిత్ర విశేషాలను ఆయన తెలియజేస్తూ 'ఎవరినైనా పరిస్థితులు మార్చేస్తాయి. పరిస్థితిని బట్టి సైలెంట్‌గా ఉన్న వ్యక్తి వైలెంట్‌గా మారిపోతాడు. ఈ సినిమాలో కూడా తన పని తాను చూసుకుంటూ హ్యపీగా జీవితాన్ని గడిపే కుర్రాడు వైలెంట్‌గా ఎందుకు మారాల్సి వచ్చింది అనే ఈ చిత్ర కథ. ఇందులో రాజ్‌తరుణ్‌ పాత్ర అందర్ని ఆకట్టుకునే విధంగా వుంటుంది. కుటుంబ భావోద్వేగాలకు, మాస్‌ అంశాలను జోడించి దర్శకుడు రవికుమార్‌ చౌదరి మూవీని చాలా చక్కగా తెరకెక్కించాడు. భార్య భర్తలు మూడు ముళ్ళ బంధానికి ఏ విధంగా కట్టుబడి ఉండాలనే అంశాన్ని కూడా ఇందులో చూపిస్తున్నాం. తప్పకుండా సినిమా అన్ని వర్గాలను అలరిస్తుందనే నమ్మకం ఉంది. ఈ మూవీతో పాటు ప్రస్తుతం జేడీ చక్రవర్తి, నరేష్ అగస్త్య, సీరత్ కపూర్‌తో ఓ సినిమా జరుగుతోంది. బాలీవుడ్‌లో కూడా ఓ సినిమాను నిర్మించడంతో పాటు.. రాహుకేతు అనే వెబ్‌సీరిస్ అలాగే తిరుపతి బాలాజీపై ఓ వెబ్‌సీరిస్‌ చేస్తున్నాను' అంటూ చెప్పుకొచ్చారు.