Kriti Shetty: చిరంజీవి సినిమాను రిజెక్ట్ చేసిన కృతి శెట్టి.. క్లారిటీ ఇస్తూ ఆసక్తికర కామెంట్స్

దిశ, సినిమా: టాలీవుడ్ యంగ్ బ్యూటీ కృతి శెట్టి ఉప్పెన సినిమాతో బ్లాక్ బస్టర్ హిట్ అందుకుని వరుస ఆఫర్లతో దూసుకుపోతుంది. ఈ అమ్మడు ఇండస్ట్రీకి వచ్చిన అతి తక్కువ సమయంలో ఫుల్ పాపులారిటీ తెచ్చుకుని నాగచైతన్య, రామ్ పోతినేని, నాని శర్వానంద్, నితిన్ వంటి హీరోలతో సినిమాలు చేసింది. ఇప్పటి వరకు తెలుగు, తమిళంలో పలు చిత్రాలు చేసిన కృతి శెట్టి ‘అజయంతే రందం మోషణం’ మూవీతో మలయాళ ఇండస్ట్రీకి పరిచయం కాబోతుంది. ఇందులో టోవినో థామస్ హీరోగా నటిస్తుండగా.. జితిన్ లాల్ దర్శకత్వం వహించారు. ఇందులో కృతి శెట్టి హీరోయిన్‌గా నటిస్తోంది. అయితే ఈ సినిమా సెప్టెంబర్ 12న విడుదల కాబోతుండటంతో ఈ అమ్మడు ప్రమోషన్స్‌లో భాగంగా వరుస ఇంటర్వ్యూలో పాల్గొంటుంది. ఇందులో భాగంగా కృతి శెట్టి తనపై వస్తున్న వార్తలపై రియాక్ట్ అవుతూ ఆసక్తికర కామెంట్స్ చేసింది. ‘‘ నా పాత్ర చాలా సవాళ్లతో కూడుకుని ఉంటుంది.

అయితే ఈ మూవీ కోసం టీమ్ అంతా అంకితభావంతో పని చేశారు. విజువల్స్ అందరినీ ఆశ్చర్యపరిచేలా ఉంటాయి. నేను ఇండస్ట్రీలోకి వచ్చిన అతి తక్కువ కాలంలోనే ఇంత గొప్ప సినిమాలో నటిస్తానని అనుకోలేదు. ఇందులో నేను ఓ పల్లెటూరి అమ్మాయిలాగా కనిపిస్తాను. అందరికీ నా క్యారెక్టర్ నచ్చేలా ఉండబోతుంది. టాలీవుడ్ ఇండస్ట్రీతో పోలిస్తే మలయాళంలో ఎక్కువ పని గంటలు ఉంటాయి. అయితే నేను షూటింగ్‌లో పాల్గొనే సమయంలో ఓ రోజు నిద్ర లేకపోవడం వల్ల కళ్లు కూడా తెరవలేని పరిస్థితి నెలకొంది. అయినా కానీ కొన్ని నెలల పాటు నేను నిద్ర లేకుండానే ఈ సినిమా కోసం కష్టపడ్డాను. మిగతా వారికి అలవాటు కాబట్టి బాగానే ఉన్నారు.

కానీ నాకు అలవాటు లేకపోవడం వల్ల అలసటగా అనిపించేది. అయితే నేను ఓ విషయంపై క్లారిటీ ఇవ్వాలనుకుంటున్నాను. మెగాస్టార్ చిరంజీవితో ఆఫర్ వస్తే రిజెక్ట్ చేసినట్లు గత కొద్ది రోజుల నుంచి వార్తలు వస్తున్నాయి. కానీ వాటిల్లో ఎలాంటి నిజం లేదు. అసలు నన్ను ఎవ్వరూ కాంటాక్ట్ అవ్వలేదు. కానీ కొందరు కావాలనే నా మీద తప్పుడు వార్తలు క్రియేట్ చేస్తున్నారు’’ అని చెప్పుకొచ్చింది. దీంతో కృతి శెట్టిపై వస్తున్న వార్తలకు చెక్ పడినట్లు అయింది. కాగా, ఈ అమ్మడు ప్రస్తుతం లవ్ ఇన్సూరెన్స్ కంపెనీ సినిమా చేస్తుంది. ఇటీవల దీనికి సంబంధించిన ఫస్ట్ లుక్ పోస్టర్ కూడా విడుదలైంది.