చనిపోయిన జంతువును పట్టుకొని ఏడుస్తున్న మగ కోలా.. హృదయాన్ని కదిలిస్తున్న వీడియో

దిశ, ఫీచర్స్: పక్కనున్న మనిషి ప్రాణాలు పోతున్న పట్టించుకోని ఈ సమాజంలో తాజాగా ఓ జంతువు చేసిన పనికి నెటిజన్లు షాక్ అవుతున్నారు. సౌత్ ఆస్ట్రేలియన్ జంతు రక్షణ స్వచ్ఛంద సంస్థ ‘కోలా రెస్క్యూ’ సోషల్ మీడియాలో షేర్ చేసిన వీడియో చూసినట్లైతే.. ఓ కోలా తన తోటి జీవి చనిపోవడంతో చేతులతో పట్టుకుని రోధించింది. ఆకాశం వైపు చూస్తూ.. దారుణంగా ఏడుస్తుంది. మరణించిన ఆడ కోలాను, మగ కోలా హత్తుకుని విలపిస్తుంది. చెట్టు కింద చనిపోయిన కోలాను పట్టుకుని మరో కోలా ఏడవటాన్ని గమనించిన స్థానికులు వెంటనే కోలా రెస్క్యూ టీమ్‌కు సమాచారం అందించారు.

రెస్క్యూ టీమ్‌ వచ్చేంత వరకు స్థానికులు వాటిని చూసుకున్నారు. ఇక రెస్క్యూ టీమ్ ఘటనా స్థలానికి చేరుకున్నాక మరణించింది ఆడ కోలా అని.. పక్కక్కుండి బాధపడుతోంది మగ కోలా అని గుర్తించారు. ఈ రెండు కోలాలను తమ సంరక్షణలోకి తీసుకుని, మగ కోలాకు ఆరోగ్య పరీక్షలు చేసి.. తిరిగి అడవిలోకి వదిలేశారు. ఆడ కోలా మరణానికి గల కారణం మాత్రం తెలియలేదు. అనారోగ్యం, గాయం లక్షణాలేవీ కనిపించలేదని రెస్క్యూ టీమ్ వెల్లడించింది. ప్రస్తుతం ఈ వీడియో నెట్టింట వైరల్ కావడంతో మనుషులకన్నా జంతువులే మేలని కామెంట్లు పెడుతున్నారు.