వేసవిలో ఈ తప్పులు చేస్తున్నారా.. జుట్టు రాలడం ఖాయం..

దిశ, ఫీచర్స్ : ప్రతి ఒక్కరూ తమ జుట్టు నల్లగా, పొడవుగా, ఒత్తుగా అందంగా ఉండాలని కోరుకుంటారు. దాని కోసం ఎన్నో టిప్స్ ని ఫాలో అవుతారు. అంతే కాదు అందమైన జుట్టు కోసం ఎంతో ఖర్చుచేసేవారు కూడా ఉన్నారు. అయితే వేసవిలో మాత్రం ఎన్ని జాగ్రత్తలు తీసుకున్నా ఏదో ఒక చిన్న పొరపాటు కారణంగా జుట్టు డ్యామేజ్ అవుతుంది. ఎండ వేడి, చెడు జీవనశైలి, పొల్యూషన్ కారణంగా జుట్టు రాలడం, జుట్టు పాడవడం వంటి సమస్యలు పెరుగుతున్నాయి. కాలుష్యం, జుట్టు సంరక్షణకు సంబంధించిన పొరపాట్లు, ఆహారంలో పోషకాల లోపం, హార్మోన్ల మార్పుల వల్ల జుట్టు నిర్జీవంగా మారుతుంది.

వేసవి కాలంలో జుట్టు విషయంలో ప్రత్యేక శ్రద్ధ తీసుకోవాల్సిన అవసరం ఉంది. ఈ సీజన్‌లో సూర్యుడి నుండి వచ్చే UV కిరణాలు జుట్టును మరింత దెబ్బతీస్తాయి. చెమటలు పట్టడం వల్ల కూడా జుట్టు రాలిపోతుందని చెబుతారు. జుట్టు సంరక్షణ కోసం, మనం కొన్ని రోజువారీ అలవాట్లను మార్చుకోవాలి. మరి ఆ వివరాల గురించి తెలుసుకుందాం.

తల పై కప్పాలి..

ఎక్కువ సూర్యకాంతిలో బయటకు వెళ్లడం చర్మానికే కాకుండా జుట్టుకు కూడా ప్రమాదకరం. దీని వల్ల జుట్టు పొడిబారుతుంది. కొంతమంది వేసవిలో తల పై కప్పుకోరు. దీంతో బయటకు వెళ్లినప్పుడు జుట్టు పై చెడు ప్రభావం పడుతుంది. సూర్యకిరణాలు జుట్టు, ప్రోటీన్‌ను నాశనం చేస్తాయి. దీని కారణంగా జుట్టు దెబ్బతింటుంది.

షాంపూ వాడకం..

వేడి కారణంగా, విపరీతమైన చెమట, చర్మంలో బ్యాక్టీరియా రావడం ప్రారంభమవుతుంది. దీనిని నివారించడానికి, ప్రజలు తమ జుట్టును షాంపూతో పదేపదే కడగాలి. కానీ రోజూ షాంపూ చేయడం వల్ల జుట్టుకు హాని కలుగుతుంది. ఎక్కువగా షాంపూ చేయడం వల్ల జుట్టు డ్యామేజ్ అవుతుంది. స్కాల్ప్ డ్రైగా మారుతుంది. అందువల్ల వారానికి రెండుసార్లు మాత్రమే షాంపూని ఉపయోగించండి.

నూనె రాయడం..

వేసవిలో అధిక చెమట పడకుండా ఉండాలంటే జుట్టుకు నూనె రాసుకోవడం మానేస్తారు. కానీ నూనె రాసుకోకపోవడం వల్ల జుట్టుకు సరైన పోషణ అందదు. దీని కారణంగా జుట్టు, తల చర్మం పొడిగా మారడం ప్రారంభమవుతుంది. వారానికి కనీసం 2 నుండి 3 సార్లు నూనె రాయండి.

అలాగే కొంతమంది తమ జుట్టును లూస్ గా ఉంచడానికి ఇష్టపడతారు. కానీ చాలా వరకు దుమ్ము, ధూళి ఓపెన్ హెయిర్‌లో పేరుకుపోతుంది. దీని కారణంగా జుట్టు మరింత పొడిగా, నిర్జీవంగా మారుతుంది.