‘గెల్లు’కు సొంత పార్టీలోనే సెగ.. టికెట్ రాకుండా ఎమ్మెల్యే అడ్డగింత

దిశ, తెలంగాణ బ్యూరో : హుజురాబాద్​ ఉప ఎన్నిక అధికార పార్టీలో చిచ్చు పెడుతోంది. హుజురాబాద్​టికెట్ ​గెల్లు శ్రీనివాస్ ​యాదవ్‌కు ఖరారైందనే నేపథ్యంలో ఒక వర్గం అడ్డుకునేందుకు తీవ్ర ప్రయత్నాలు చేస్తోంది. మంత్రి కేటీఆర్ ​కోటరీలోని ఓ కీలక నాయకుడు ఈ బాధ్యతలను భుజాలపై వేసుకున్నారు. విద్యార్థి నేతగా టీఆర్ఎస్‌లో గుర్తింపు పొంది, ప్రస్తుతం ఓ నియోజకవర్గం నుంచి అసెంబ్లీకి ప్రాతినిధ్యం వహిస్తున్న సదరు నాయకుడు గెల్లు శ్రీనివాస్‌కు టికెట్ ​ఇవ్వకుండా ప్రయత్నాలు చేస్తున్నారు. ప్రస్తుతం విద్యార్థి సంఘం తరుపున యూనివర్సిటీలో ఉద్యమానికి నాయకత్వం వహించిన తనకు మినహా మరెవ్వరికీ ప్రభుత్వంలో ప్రాధాన్యం ఉండరాదనే కోణంలో గెల్లుకు అడ్డుపుల్ల వేస్తున్నారు.

ఆయన గెలువడు సార్​..!

హుజురాబాద్ ​అసెంబ్లీ స్థానానికి అభ్యర్థి కోసం టీఆర్ఎస్ ​అష్టకష్టాలు పడుతోంది. ఇప్పటికీ ఎవరికి టికెట్​ఇస్తారనేది తేలడం లేదు. అయితే ఇటీవల గెల్లు శ్రీనివాస్ ​యాదవ్​ పేరు ఖరారైనట్లు తెలంగాణ భవన్​నుంచి లీకైంది. అంతేకాకుండా హుజురాబాద్​ నేతలతో మంత్రి హరీశ్​రావు ఇటీవల సిద్దిపేటలో వరుస సమావేశాలను నిర్వహిస్తున్నారు. ఈ సమావేశాల్లో గెల్లు శ్రీనివాస్​ ప్రధానంగా ఉండటం, ఆయనకు టికెట్​ఇచ్చే చాన్స్ ​ఉందంటూ టీఆర్ఎస్‌లోని ఒక వర్గం ప్రచారం చేస్తోంది. ఈ నేపథ్యంలో మాజీ విద్యార్థి నేతలు గెల్లుకు అడ్డుపుల్ల వేస్తున్నట్లు తెలుస్తోంది. మంత్రి కేటీఆర్‌తో సన్నిహితంగా ఉంటే సదరు విద్యార్థి నేత, ఎమ్మెల్యే శ్రీనివాస్‌కు టికెట్ ​ఇస్తే అక్కడ బీజేపీకి గెలుపుకు అవకాశం ఇచ్చినట్లే అవుతుందని బాహాటంగానే చెప్పుతున్నట్లు సమాచారం.

ప్రస్తుతం గెల్లు శ్రీనివాస్‌కు హుజురాబాద్ ​ప్రాంతం నేతలతో సంబంధం లేదని, ఇక్కడ విద్యార్థి సంఘంలో మాత్రమే పరిచయాలున్నాయని, అక్కడ కొత్త అభ్యర్థిగా చూసే అవకాశం ఉందని, దీంతో ఆయనకు ఓట్లు వేయరంటూ ప్రచారం చేపిస్తున్నారని పార్టీ వర్గాలు చెప్పుతున్నాయి. వాస్తవంగా గత కొంతకాలం కిందట వరకు కౌశిక్​రెడ్డి లేదా పెద్దిరెడ్డికి టికెట్ ​వస్తుందనే ధీమాతో పార్టీ నేతలున్నారు. కానీ కౌశిక్​రెడ్డికి గవర్నర్​కోటా ఎమ్మెల్సీ అవకాశం రావడంతో ఇక బీసీ వర్గానికే టికెట్ ​ఇస్తారని భావిస్తున్నారు. అయితే కాంగ్రెస్​ నుంచి చేరిన స్వర్గం రవి, టీఆర్ఎస్​ నేత పొనగంటి మల్లయ్యతో పాటు గెల్లు శ్రీనివాస్ పేరు కూడా ప్రచారంలో ఉంది. వీణవంకకు చెందిన గెల్లు శ్రీనివాస్ ​తనకు టికెట్ ​ఇవ్వాలంటూ పార్టీ పెద్దలను వేడుకుంటున్నాడు.

వద్దంటే వద్దు

కాగా గెల్లుకు వ్యతిరేకంగా టీఆర్ఎస్‌లోని మరో వర్గం ప్రచారానికి దిగింది. దీనికి ఓ విద్యార్థి నేత సూత్రదారుడిగా ఉన్నట్లు తెలంగాణ భవన్‌లో టాక్. ఎందుకంటే టీఆర్ఎస్ ​అనుబంధ విద్యార్థి సంఘం నుంచి ఇద్దరు నేతలు శాసనసభకు ప్రాతినిధ్యం వహిస్తుండగా… ఒక ఎమ్మెల్యే మాత్రం అటు సీఎం కేసీఆర్, ఇటు మంత్రి కేటీఆర్ కోటరీలోనూ కీలకంగా ఉంటున్నారు. ఇప్పుడు అదే విద్యార్థి సంఘం నేతగా ఉన్న గెల్లు శ్రీనివాస్‌కు హుజురాబాద్ ​టికెట్ ఖరారై, ఒకవేళ గెలిస్తే తనకు పోటీగా ఈ కోటరీల్లో ఉంటాడనే భయం వెంటాడుతోంది. ఈ కారణంగానే ఆయనకు టికెట్​ రాకుండా ప్రయత్నాలు చేస్తున్నట్లు చెప్పుకుంటున్నారు. ఇప్పటికే మంత్రి కేటీఆర్‌కు పదేపదే ఈ విషయంపై ఫిర్యాదు చేస్తున్నట్లు గులాబీ నేతలే గుసగుసలాడుకుంటున్నారు.