పిడికెడు మట్టి

 ఈ మట్టి కథనే వేరు

ఇక్కడి చెట్ల గాలి కూడా గొంతు విప్పి

పోరుపాటందుకుంటది.

ఈ మట్టికి చరిత్ర ఉన్నదనేది పాత మాట

అసలు ఈ నేలంటేనే

చరిత్ర కాయిదాలపై

పాతేయబడ్డ ఉక్కు స్తంభం కదా..

సాయుధ పోరాటమైన

స్వాతంత్ర్య రణతంత్రమైన

పోరేదైనగానీ

యుద్ధ భూమిలో పొడిసిన

పోరుబిడ్డలే ఈ మట్టి బిడ్డలు.

ఈ మట్టిపై

ఏ పాదం కాలుమోపిన

జీవిత కాలమంతా గుర్తుపెట్టుకునే

మహిమ గలది.

ఈ మట్టిపై నాగలిని మోపి

నాల్గు ఇత్తులను చల్లితే

పల్లె ఆకలి తీర్చే

అమ్మలాంటి చేయి ఈ మన్నులోగలదు.

ముంగిలిలో కూసున్న ముసలోడిని

పల్కరించిన

మున్నూటరవై కథలు

ఇన్నూట ఇరవై శాస్త్రాలను దోసిట్లో ధారబోస్తడు.

ఈ మట్టిలో ఏదో మహత్తరమైన వాద్యం

నాటినట్లున్నారు

లేకపోతే ఏ యలమందను

తడిమిన అలుపురాని

రేలపాటలెలా జాలువారుతాయి.

ఈ మట్టికి సంగీతమంటే ప్రాణమే

కల్లుగేర్ల కాసింత సేపు సేదదీరిన

చెవ్వారా పల్లెసుద్దుల పద్యం గొంతెత్తుకుంటది.

ఈ మట్టిని పిడికిట తీసుకొని

నుదుట దిద్దుకుంటే

మేధావులైతారనీ

జరిగిన చరిత్రను

ఇక్కడ ఒక కవి రాస్తున్నాడు...

అవని శ్రీ

9985419424