జన్మ కోసం పునర్జన్మ - అమ్మ

అమృతానంద పదం అమ్మ

అవిశ్రాంత శ్రమజీవి అమ్మ

త్యాగానికి ప్రతిరూపం అమ్మ

ప్రేమకు చిరునామా అమ్మ

స్పర్శకు మారు పేరేగా అమ్మ !

గూటికి గుండెకాయ అమ్మ

అనంత ఆనంద నిధి అమ్మ

గృహసీమ సౌభాగ్యం అమ్మ

జన్మ కోసం పునర్జన్మ అమ్మ

తొలి పలుకుల గురువేగా అమ్మ !

మమతల కోవెల అమ్మ

అనురాగ దేవత అమ్మ

బంధాలకు పుణాది అమ్మ

నాన్న ప్రాణ నేస్తం అమ్మ

కుటుంబ శ్వాసేగా అమ్మ !

పిల్లల మది దేవత అమ్మ

ఆకలి ఎరిగిన నేర్పరి అమ్మ

కన్నీళ్లకు అడ్డుకట్ట అమ్మ

ఇంటికి దీపస్తంభం అమ్మ

పెరటి తులసి మెుక్కేగా అమ్మ !

గడప పసుపు పారాణి అమ్మ

కోకిల గానపు లాలన అమ్మ

చిరునవ్వుల చిరునామా అమ్మ

ఉగ్గుపాల తీపి రుచి అమ్మ

పేగు తెగిన తీపి నొప్పేగా అమ్మ !

వెన్నెలంత చల్లని చూపు అమ్మ

వెన్నంత మృదు మనసు అమ్మ

ఆకాశమంత ఆరాటం అమ్మ

అంతరిక్షమంత ప్రేమ అమ్మ

మల్లెల సుగంధ మాటలే అమ్మ !

సడలని మనో ధైర్యం అమ్మ

వర్షించే సంక్షేమ మబ్బు అమ్మ

మండుటెండలో హిమ క్రీమ్‌ అమ్మ

చలి కాలంలో భోగి మంట అమ్మ

జోరు వానలో రక్షణ గొడుగేగా అమ్మ !

రక్తాన్ని చనుబాలుగా మార్చేది అమ్మ

ఆకలి మరిచి అన్నం పంచేది అమ్మ

పిల్లల జీవన నడకకు కందెన అమ్మ

బతుకు బండి ఇంధనం అమ్మ

అందరికీ తొలి పలుకేగా అమ్మ..!

(14న ‘మాతృదినోత్సవం’ సందర్భంగా)

డా. బుర్ర మధుసూదన్ రెడ్డి

కరీంనగర్‌ - 9949700037