Flash News: మాజీ ఎమ్మెల్యే రాజయ్య కారు ఢీకొని మహిళ మృతి..
నిత్యం ఏదో వివాదంలో ఉండే మాజీ ఎమ్మెల్యే రాజయ్య మరో వివాదంలో చిక్కుకున్నారు.
దిశ, హనుమకొండ టౌన్ : స్టేషన్‌ ఘన్‌పూర్‌ మాజీ ఎమ్మెల్యే డాక్టర్‌ తాటికొండ రాజయ్య ప్రయాణిస్తున్న కారు ఢీకొట్ట‌డంతో ఓ మహిళ మృత్యువాత ప‌డింది. ఈ ఘ‌ట‌న కాజీపేట మండలం మడికొండలో శనివారం రాత్రి జరిగింది. పోలీసులు తెలిపిన వివ‌రాల ప్ర‌కారం.. మడికొండ ఎస్సీ కాలనీకి చెందిన కలకోట స్వప్న(40) అదే ప్రాంతంలో శనివారం రాత్రి డివైడర్‌ మధ్య నుంచి రోడ్డు దాటుతుండగా హైదరాబాద్‌ వైపు నుంచి వస్తున్న మాజీ ఎమ్మెల్యే రాజయ్య కారు ఆమెను ఢీకొట్టింది.
దీంతో ఎగిరిపడిన స్వప్న అక్కడికక్కడే మరణించింది. ప్రమాద సమయంలో రాజయ్య కారులోనే ఉన్నారు. ప్రమాదం జరిగిన వెంటనే కారు దిగిన రాజయ్య.. బాధిత మహిళను చూశారని, పోలీసు స్టేషన్‌కు వచ్చి మాట్లాడతా.. దయచేసి నన్ను ఇబ్బంది పెట్టవద్దు’ అని పోలీసులతో అన్నారని సమాచారం. ప్రమాదానికి కారణమైన కారును కాజీపేట బాపూజీనగర్‌లో వదిలిసి రాజయ్య వెళ్లిపోయారు. మృతురాలు స్వప్నకు భర్త, కుమారుడు ఉన్నారు. ప్రమాదంపై కేసు నమోదు చేసిన పోలీసులు దర్యాప్తు చేపట్టారు.