కిడ్నాప్ కలకలం..చాక్లెట్ ఆశ చూపి.. నాలుగు గంటలు బంధించి

దిశ,దౌల్తాబాద్: పచ్చని పల్లె లో కిడ్నాప్ కలకలం ఆ గ్రామస్తులను కలవరింతకు గురిచేసింది. ముక్కు పచ్చలారని ఓ చిన్నారిని చాక్లెట్ ఆశ చూపి కారులో తీసుకెళ్లిన దుండగులు నాలుగు గంటల అనంతరం మళ్లీ తిరిగి గ్రామ సమీపంలో వదిలి వెళ్లడంతో గ్రామస్తులు ఊపిరి పీల్చుకున్నారు. కానీ ఈ ఘటనతో మండలం మొత్తం ఉలిక్కిపడింది. పిల్లల భద్రత గురించి తల్లిదండ్రులు తీవ్ర ఆందోళన చెందుతున్నారు. గ్రామస్తులు బాలిక తల్లిదండ్రులు తెలిపిన వివరాల ప్రకారం తిరుమలాపూర్ గ్రామానికి చెందిన బాలిక స్థానిక ప్రాథమిక పాఠశాలలో 4వ తరగతి చదువుతోంది. కాగా సోమవారం బాలిక 11 గంటల సమయంలో స్నేహితురాలు ఇంటికి నోట్ బుక్ కోసం వెళ్లగా కారులో వచ్చిన దుండగులు చాక్లెట్ ఇస్తామని నమ్మబలికారు.

వద్దని బాలిక వారించిన కారులోంచి దిగిన ఒక దుండగుడు బాలిక నితీసుకెళ్లి కారు డిక్కీలో వేసుకొని వెళ్లిపోయారు. ఉదయం సుమారు 12 గంటల ప్రాంతం నుంచి సాయంత్రం నాలుగు గంటల వరకు బాలికను కారులో బంధించి వివిధ ప్రాంతాలను తిప్పిన దుండగులు సాయంత్రం నాలుగు గంటల ప్రాంతంలో తిరుమలాపూర్ గ్రామ సమీపంలో బాలికని విడిచి వెళ్లారు. కాగా అనంతరం బాలిక కుటుంబ సభ్యులు దౌల్తాబాద్ పోలీసులకు ఫిర్యాదు చేశారు. బాధితుల ఫిర్యాదు మేరకు కేసు నమోదు చేసిన పోలీసులు గ్రామంలో ఉన్న సీసీటీవీ పుటేజీల ఆధారంగా దర్యాప్తు జరుపుతున్నారు.