short circuit : షార్ట్ సర్క్యూట్ తో పూరి గుడిసె దగ్ధం..

దిశ, కథలాపూర్ : షార్ట్ సర్క్యూట్ తో పూరి గుడిసె దగ్ధమైన ఘటన కథలాపూర్ మండలం చింతకుంట గ్రామంలో చోటుచేసుకుంది. వివరాల్లోకి వెళితే గ్రామానికి చెందిన వేముల కనకవ్వ అనే పేద మహిళకు చెందిన పూరి గుడిసె సోమవారం మధ్యాహ్నం సమయంలో దగ్ధం అయ్యింది. ఈ ప్రమాదంలో గుడిసెలో ఉన్న వస్తువులతో పాటు సుమారు 10 వేల నగదు మంటల్లో కాలి బూడిదయ్యిందని బాధితురాలు బోరున విలపించింది.

తమను ప్రభుత్వం ఆదుకోవాలని కనకవ్వ వేడుకుంది. కాగా కనకవ్వ రోజువారీ కూలీ నిమిత్తం వ్యవసాయ పనులకు వెళ్ళినప్పుడు ఈ దుర్ఘటన జరిగిందని స్థానికుల సమాచారం. అయితే విషయం తెలుసుకున్న మాజీ ఉపసర్పంచ్ లోక నర్సారెడ్డి, కట్ట శంకర్ కనకవ్వ కుటుంబానికి నిత్యావసర వస్తువులను పంపిణీ చేశారు. ప్రమాద సమయంలో ఇంట్లో ఎవరూ లేకపోవడంతో ప్రాణనష్టం తప్పింది.