బేల్ తరోడలో నివాస గృహం దగ్ధం...

దిశ, బైంసా : తానూర్ మండలంలోని బెల్ తరోడా గ్రామంలో గురువారం భారీ అగ్ని ప్రమాదం జరిగింది. గ్రామానికి చెందిన బాయి భోజన్న అనే వ్యక్తి ఇంట్లో జరిగిన ఈ అగ్నిప్రమాదంలో అపార నష్టం వాటిల్లింది. ఉదయం వేళలో కుటుంబీకులు శుభకార్యానికి హాజరయ్యేందుకు భైంసా పట్టణానికి వెళ్లారు. తిరిగివచ్చేసరికి ఇల్లు దగ్ధమైపోవడాన్ని చూసి భోరుమన్నారు. షార్ట్ సర్క్యూట్ తో అగ్నిప్రమాదం జరిగినట్లు కుటుంబీకులు భావిస్తున్నారు. ఇంట్లో ఎవరూ లేకపోవడంతో మంటలు మొత్తం నివాస గృహాన్ని వ్యాపించడంతో నష్టం అధికంగా వాటిల్లినట్లుగా సమాచారం.

ప్రమాదంలో ఇంట్లో దాచి ఉంచిన దాదాపు రూ. ఏడు లక్షలకు పైగా నగదు కాలిబూడిదైపోయిందని, బంగారు అభరణాలు మంటల ధాటికి ముద్దగా మారాయని, ఇంట్లోని నిత్యావసర సరుకులు, కట్టుబట్టలు, సామాగ్రి, ఎలక్ట్రికల్ పరికరాలు దగ్ధమై పనికి రాకుండా పోయాయని తెలిపారు. అగ్ని ప్రమాద సమాచారం అందుకున్న భైంసా ఫైర్ ఇంజన్ సిబ్బంది ఘటన స్థలానికి చేరుకొని మంటలను ఆర్పివేసింది. అప్పటికే ఇంటి లోపలి వస్తువులన్నీ దగ్ధమైపోయాయి. సంబంధిత సమాచారం తెలుసుకున్న బాధిత కుటుంబీకులు గ్రామానికి చేరుకునే సమయానికే ఇల్లు మొత్తం దగ్ధమై అపార నష్టం జరిగింది. బాధిత కుటుంబ సభ్యులు రోదించిన తీరు అందరినీ కలిచివేసింది.