క్రేజీ న్యూస్ : పవన్ – త్రివిక్రమ్ స్టోరీ రెడీ.. ‘కోబలి’?

దిశ, సినిమా : పవర్‌స్టార్ పవన్ కల్యాణ్ రీఎంట్రీ మూవీ ‘వకీల్ సాబ్’ సక్సెస్‌ను ఆ మూవీ యూనిట్ ఎంజాయ్ చేస్తోంది. అయితే కరోనా బారినపడ్డ పవన్ ప్రస్తుతం చికిత్స పొందుతుండగా, ఆయన త్వరగా కోలుకోవాలని సినీ ప్రముఖులు, ఫ్యాన్స్ ప్రార్థనలు చేస్తున్నారు. కాగా పవన్ కల్యాణ్ – త్రివిక్రమ్ కాంబోలో మరో సినిమా రాబోతుందనే వార్త ఫిల్మ్ నగర్ సర్కిల్స్‌లో చక్కర్లు కొడుతోంది. వారి కాంబినేషన్‌లో ఇప్పటికే ‘జల్సా, అత్తారింటికి దారేది, అజ్ఞాతవాసి’ చిత్రాలు రాగా, ఇందులో ఒకటి డిజాస్టర్ అయిన విషయం విదితమే. ఆ తర్వాత కూడా వీరి కాంబోలో ‘కోబలి’ అనే రాయలసీమ ఫ్యాక్షన్ బేస్డ్ స్టోరీ తెరకెక్కనుందనే చర్చ జరిగింది కానీ కార్యరూపం దాల్చలేదు. అయితే తాజాగా ఈ స్టోరీ గురించి చర్చించారని, కొద్దిగా మార్పులు చేసి మరోసారి పవన్‌కు వినిపించనున్నారని సమాచారం.

ఇదిలా ఉంటే, జూనియర్ ఎన్టీఆర్‌తో త్రివిక్రమ్ శ్రీనివాస్ కాంబినేషన్‌లో తెరకెక్కాల్సిన సినిమా క్యాన్సిల్ అయింది. తారక్ తన నెక్స్ట్ మూవీ కొరటాల శివతో చేయబోతున్నట్లు అఫీషియల్ అనౌన్స్‌మెంట్ కూడా వచ్చింది. ఈ క్రమంలోనే త్రివిక్రమ్ మహేశ్‌తో హ్యాట్రిక్ సినిమా చేయనున్నట్లు, ఈ చిత్రాన్ని సూపర్ స్టార్ కృష్ణ పుట్టిన రోజు(మే 31న) అనౌన్స్ చేయనున్నట్లు తెలుస్తోంది. ఈ సినిమా పూర్తయిన తర్వాతే పవన్‌తో సినిమా చేస్తారట త్రివిక్రమ్. ఆ లోపల పవన్ మూడు పెండింగ్ ప్రాజెక్టులను పూర్తిచేస్తారని టాక్.