Vishwaksen : నటుడు విశ్వక్సేన్ ఇంట్లో భారీ చోరీ

దిశ, వెబ్ డెస్క్ : టాలీవుడ్ హీరో విశ్వక్సేన్(Vishwaksen) ఇంట్లో ఆదివారం తెల్లవారు జామున భారీ దొంగతనం(Robbery) జరిగింది. ఫిలింనగర్ రోడ్డు నెంబర్ 8లోని విశ్వక్‌సేన్ నివాసంలో ఈ ఘటన చోటుచేసుకోగా.. ఆయన తండ్రి కరాటే రాజు ఫిలింనగర్ పోలీస్ స్టేషన్‌(Film nagar PS)లో ఫిర్యాదు చేసిన‌ట్లు స‌మాచారం. విశ్వక్ కుటుంబమంతా ఒకే ఇంట్లో నివాసముంటుండగా.. విశ్వక్సేన్ సోదరి వన్మయి గది మూడో అంతస్తులో ఉంది. ఆదివారం తెల్లవారుజామున తన గదిలో వస్తువులన్ని చిందరవందరగా పడి ఉండడం గమనించిన వ‌న్మయి.. అనుమానం వచ్చి, అల్మారాలను తనిఖీ చేయగా అందులో ఉన్న బంగారం చోరీకి గుర‌యిన‌ట్లు గుర్తించింది. దీంతో వెంట‌నే ఈ విషయాన్ని తన తండ్రికి చెప్పగా, ఆయన పోలీసులకు సమాచారం అందించారు.

సమాచారం అందుకున్న పోలీసులు ఘటనా స్థలానికి చేరుకుని క్లూస్ టీం సహాయంతో వేలిముద్రలను సేకరించారు. అలాగే ఇంటి చుట్టుపక్కల ఉన్న సీసీటీవీ కెమెరాల ఫుటేజీని పరిశీలించారు. తెల్లవారుజామున 5:50 గంటల సమయంలో ఒక గుర్తు తెలియని వ్యక్తి బైక్‌పై వచ్చినట్టు కెమెరాల్లో రికార్డు అయింది. ఆ వ్యక్తి గేటు తెరిచి, నేరుగా మూడో అంతస్తుకు చేరుకుని, వెనుక ద్వారం గుండా బెడ్‌రూంలోకి ప్రవేశించినట్టు పోలీసులు గుర్తించారు. అక్కడ అల్మారాలో నుంచి బంగారు ఆభరణాలను దొంగిలించినట్టు తెలుస్తోంది. సీసీటీవీ ఫుటేజీ ప్రకారం, ఆ దొంగ కేవలం 20 నిమిషాల్లోనే చోరీ పూర్తి చేసి, అక్కడి నుంచి పరారైనట్టు పోలీసులు నిర్ధారించారు. చోరీలో రెండు డైమండ్ రింగులు సహా రూ.2.20 లక్షల విలువైన ఆభరణాలు మాయమైనట్టు ఫిర్యాదులో పేర్కొన్నారు.

పోలీసులు కేసు నమోదు చేసి, సీసీటీవీ ఆధారంగా నిందితుడి కోసం గాలింపు చర్యలు మొదలుపెట్టారు. అయితే, ఈ చోరీ వెనుక ఆసక్తికరమైన అనుమానాలు వ్యక్తమవుతున్నాయి. గేటు నుంచి నేరుగా మూడో అంతస్తుకు వెళ్లి, కేవలం 20 నిమిషాల్లో చోరీ చేసి, సునాయాసంగా వెళ్లిపోవడం చూస్తుంటే, ఇది ఇంటి గురించి బాగా తెలిసిన వ్యక్తి పని కావచ్చని పోలీసులు భావిస్తున్నారు. దీంతో, అనుమానితులపై ప్రత్యేక దృష్టి సారించి దర్యాప్తు కొనసాగిస్తున్నారు.