పునీత్ రాజ్‌కుమార్ మృతిపై దిగ్భ్రాంతి వ్యక్తం చేసిన చిరు, పవన్

దిశ, వెబ్‌డెస్క్: కన్నడ పవర్ స్టార్ పునీత్ రాజ్ కుమార్ గుండెపోటుతో మరణించారు. శుక్రవారం ఉదయం గుండెపోటుతో బెంగళూరులోని విక్రమ్ ఆసుపత్రిలో చేరిన ఆయనకు ఐసీయూలో ఉంచి డాక్టర్లు చికిత్స చేశారు. డాక్టర్లు ఎంత ప్రయత్నించినప్పటికీ ఫలితం లేకుండా పోయింది. ఆయన మరణించినట్టు డాక్టర్లు ధృవీకరించారు. పునీత్ రాజ్‌కమార్ పట్ల అభిమానులు, సినీ ప్రముఖులు విషాదంలో మునిగిపోయారు. పునీత్ మరణవార్త తెలిసిన సినీ ప్రముఖులు, అభిమానులు స్పందించి ఆసుపత్రికి తరలివస్తున్నారు.

తాజాగా.. పునీత్ రామ్‌కుమార్ మరణంపై మెగాస్టార్ చిరంజీవి, పవర్ స్టార్ పవన్ కల్యాణ్‌లు స్పందించారు. ఆయన మృతిపై చిరంజీవి, పవన్ కల్యాణ్ తీవ్ర దిగ్భ్రాంతి వ్యక్తం చేశారు. పునీత్ మరణం కన్నడ చిత్ర పరిశ్రమకు తీరనిలోటు అని పవన్ అన్నారు. కన్నడ పరిశ్రమ ఒక స్టార్ హీరోను కోల్పోయిందని చిరంజీవి ఆవేదన వ్యక్తం చేశారు.

కాగా, ప్రస్తుతం ఆయన మృతదేహాన్ని బెంగళూరు సదాశివనగర్‌లోని ఆయన నివాసానికి తరలించారు. అభిమానుల సందర్శనార్థం సాయంత్రం ఐదు గంటలకు కంఠీరవ స్టేడియానికి పునీత్ పార్థీవదేహాన్ని తరలించనున్నారు. తండ్రి సమాధి వద్ద రేపు అంత్యక్రియలు నిర్వహిస్తామని కుటుంబసభ్యులు వెల్లడించారు.