100 మిలియన్ డాలర్ల అప్పు చెల్లించిన వేదాంత!

న్యూఢిల్లీ: ఇటీవల అదానీ-హిండెన్‌బర్గ్ వివాదం నేపథ్యంలో వేదాంత రీసొర్సెస్ అప్పుల్లో ఉందనే వార్తలు వినిపించాయి. ఈ క్రమంలో అనిల్ అగర్వాల్ నేతృత్వంలోని వేదాంత తన రుణ భారాన్ని తగ్గించుకునే ప్రయత్నాలు మొదలు పెట్టింది. బుధవారం సింగపూర్‌కు చెందిన స్టాండర్డ్ చార్టర్డ్ బ్యాంకుకు ఇవ్వాల్సిన 100 మిలియన్ డాలర్ల రుణాలను చెల్లించినట్టు ప్రకటించింది. ఈ చెల్లింపు గత నెల 10వ తేదీనే పూర్తయిందని స్టాక్ ఎక్స్ఛేంజ్ ఫైలింగ్‌లో కంపెనీ తెలిపింది.

గతేడాది సెప్టెంబర్‌లో వేదాంతాకు చెందిన ట్విన్‌స్టార్ హోల్డింగ్ స్టాండర్డ్ చార్టర్డ్ బ్యాంకు నుంచి అప్పు తీసుకుంది. దీనికి వేదాంతతో పాటు వెల్టర్ ట్రేడింగ్ కూడా హామీ ఇచ్చింది. ఆ మొత్తాన్నే తాజాగా తిరిగి చెల్లించామని, దీంతో గడిచిన 11 నెలల కాలంలో సుమారు 2 బిలియన్ డాలర్ల విలువైన రుణాలను తిరిగి చెల్లించినట్టు కంపెనీ వివరించింది.

ఈ ఏడాది జూన్ నాటికి మరిన్ని నిధులు సమీకరించుకోగలమని కంపెనీ అభిప్రాయపడింది. మెచ్యూరిటీ కానున్న 900 మిలియన్ డాలర్ల విలువైన రుణాలను చెల్లించేందుకు తగినన్ని నిధులు తమ వద్ద ఉన్నాయని ఇటీవల అనిల్ అగర్వాల్ పెట్టుబడిదారులకు హామీ ఇచ్చారు.