మరో మూడేళ్లు HDFC బ్యాంక్ సీఈఓగా జగదీషన్

ముంబై: ప్రైవేట్ రంగ దిగ్గజం హెచ్‌డీఎఫ్‌సీ బ్యాంక్ మేనేజింగ్ డైరెక్టర్, సీఈఓ శశిధర్ జగదీషన్‌ను మరో మూడేళ్ల కాలానికి కొనసాగించేందుకు ఆర్‌బీఐ ఆమోదం తెలిపింది. ఈ మేరకు బ్యాంకు మంగళవారం ఎక్స్ఛేంజ్ ఫైలింగ్‌లో వెల్లడించింది. ఆర్‌బీఐ ఆదేశాల ప్రకారం, అక్టోబర్ 27, 2023 నుంచి 2026, అక్టోబర్ 26 వరకు శశిధర్ జగదీషన్‌ను మరోసారి 3 ఏళ్లు తిరిగి నియమించడానికి ఆమోదించింది.

తొలిసారిగా 1996లో హెచ్‌డీఎఫ్‌సీ బ్యాంకులో చేరిన జగదీషన్ సంస్థ ఎదుగుదలలో కీలక పాత్ర పోషించారు. ఫైనాన్స్ విభాగంలో మేనేజర్‌గా మొదలై అనేక పదవుల్లో ఆయన బాధ్యతలు నిర్వహించారు. 1999లో బిజినెస్ హెడ్-ఫైనాన్స్, 2008లో బ్యాంకు చీఫ్ ఫైనాన్షియల్ ఆఫీసర్‌గా ఎదిగారు. ఆయన నాయకత్వంలోనే హెచ్‌డీఎఫ్‌సీ, హెచ్‌డీఎఫ్‌సీ బ్యాంకుల విలీనం జరిగింది. భౌతిక శాస్త్రంలో స్పెషలైజేషన్ సైన్స్‌లో డిగ్రీ చేసిన శశిధర్ జగదీషన్, వృత్తిరీత్యా ఛార్టర్డ్ అకౌంటెంట్, మనీ, బ్యాంకింగ్, ఫైనాన్స్‌లో మాస్టర్ డిగ్రీ తీసుకున్నారు.