Finance Ministry: గ్రామీణ బ్యాంకుల విలీన ప్రక్రియను ప్రారంభించిన ఆర్థిక మంత్రిత్వ శాఖ

దిశ, బిజినెస్ బ్యూరో: ప్రాంతీయ గ్రామీణ బ్యాంకుల(ఆర్ఆర్‌బీ) సామర్థ్యాన్ని పటిష్టం చేయడంతో పాటు ఖర్చులను తగ్గించేందుకు ఆర్ఆర్‌బీలను ప్రభుత్వం విలీనం చేస్తున్న సంగతి తెలిసిందే. ఇదివరకే మూడు దశలు పూర్తయిన ఈ ప్రక్రియలో నాలుగో దశను నిర్వహించేందుకు కేంద్ర ఆర్థిక మంత్రిత్వ శాఖ సిద్ధమైంది. ఈ ప్రక్రియ పూర్తయితే గ్రామీణ బ్యాంకుల సంఖ్య 43 నుంచి 28కి చేరే అవకాశాలు ఉన్నాయి. ఆర్థిక మంత్రిత్వ శాఖ రూపొందించిన రోడ్‌మ్యాప్ ప్రకారం, వివిధ రాష్ట్రాల్లోని 15 ఆర్ఆర్‌బీలు విలీనం కానున్నాయి. వాటిలో ఆంధ్రప్రదేశ్‌కు చెందిన 4 గ్రామీణ బ్యాంకులు విలీనమవుతాయి. అయితే ఆంధ్రప్రదేశ్ గ్రామీణ వికాస్ బ్యాంక్, తెలంగాణ గ్రామీణ బ్యాంక్ విలీన ప్రక్రియ ఆస్తులు, అప్పులను సర్దుబాటు చేసిన తర్వాతే ఉండనుంది. మిగిలిన రాష్ట్రాలకు సంబంధించి యూపీ, బెంగాల్‌లలో 3 చొప్పున, బీహార్, కర్ణాటక, మహారాష్ట్ర, గుజరాత్, జమ్మూకశ్మీర్, ఒడిశా, మధ్యప్రదేశ్, రాజస్థాన్‌లలో 2 చొప్పున ఆర్ఆర్‌బీలు విలీనం కానున్నాయి. ఒక రాష్ట్రం, ఒక ఆర్ఆర్‌బీ ద్వారా గ్రామీణ బ్యాంకులను మరింత సమర్థవంతంగా నిర్వహించేందుకు వీలవుతుందని ఆర్థిక మంత్రిత్వ శాఖ అధికారి చెప్పారు. గ్రామాల్లో ఉండే రైతులు, వ్యవసాయ కూలీలు, వ్యాపారులకు రుణాలు ఇచ్చేందుకు ఆర్ఆర్‌బీ చట్టం-1976 పరిధిలో ఆర్ఆర్‌బీలు ఏర్పాటయ్యాయి. ఇవి సాధారణ బ్యాంకులకు భిన్నంగా పనిచేస్తాయి. ఆర్ఆర్‌బీల్లో కేంద్ర ప్రభుత్వం 50 శాతం వరకు వాటా ఉంది. మిగిలిన దాంట్లో స్పాన్సర్ బ్యాంకుకు 35 శాతం, సంబంధిత రాష్ట్ర ప్రభుత్వానికి 15 శాతం వాటాలు ఉన్నాయి.