మార్కెట్లోకి బజాజ్ కొత్త పల్సర్.. ధర రూ.1.50 లక్షలు

దిశ, బిజినెస్ బ్యూరో: ప్రముఖ టూవీలర్ తయారీ కంపెనీ బజాజ్ నుంచి కొత్త మోడల్ మార్కెట్లోకి విడుదలైంది. దీని పేరు ‘2024 పల్సర్ N250’. ధర రూ.1.50 లక్షలు(ఎక్స్-షోరూమ్). పల్సర్ పాత మోడళ్లతో పోలిస్తే ఇది సరికొత్త ఫీచర్లతో వచ్చింది. డిజైన్ పరంగా మాత్రం ఎలాంటి మార్పులు చేయలేదు. బైక్ పెరల్ మెటాలిక్, బ్రూక్లిన్ బ్లాక్, గ్లోసీ రేసింగ్ రెడ్ కలర్ వేరియంట్లలో లభిస్తుంది. ఇది 249cc, సింగిల్-సిలిండర్ ఇంజన్‌తో వస్తుంది. 24bhp పవర్, 21.5Nm గరిష్ట టార్క్‌ను ఉత్పత్తి చేస్తుంది. స్లిప్, అసిస్ట్ క్లచ్ ద్వారా 5-స్పీడ్ గేర్‌బాక్స్‌ను కలిగి ఉంది. దీనిలో మూడు ABS మోడ్‌లు ఉన్నాయి, అవి రెయిన్, రోడ్, ఆఫ్-రోడ్.

ఇది స్మార్ట్‌ఫోన్ కనెక్టివిటీ సదుపాయాన్ని సైతం కలిగి ఉంటుంది. దీంతో రైడర్‌లు కాల్స్, మెసేజ్‌లు, ఇతర నోటిఫికేషన్‌లను సైతం చూడవచ్చు. అలాగే సరికొత్త డిజిటల్ ఇన్‌స్ట్రుమెంట్ కన్సోల్‌లో టర్న్-బై-టర్న్ నావిగేషన్, స్పీడోమీటర్, ఓడోమీటర్, ఫ్యూయల్ లెవెల్, ఖాళీకి దూరం, సర్వీస్‌ రిమైండర్, మైలేజ్ వంటి మరిన్ని ముఖ్యమైన సమాచారాన్ని స్పష్టంగా చూడగలరు. ఇది ట్రాక్షన్ కంట్రోల్ సిస్టమ్‌ను కూడా పొందుతుంది. ముందు USD ఫోర్క్‌లు, వెనుకవైపు మోనోషాక్‌ను అందించారు. కొత్త పల్సర్‌లో ABSతో రెండు చివరలలో డిస్క్ బ్రేక్‌లను అమర్చారు.