టీఆర్ఎస్‌‌లో చేరిన బీజేపీ కౌన్సిలర్

దిశ, మహబూబ్‌నగర్: మహబూబ్ నగర్‌లో అధికార టీఆర్ఎస్ పార్టీలోకి వలసల ప్రవాహం కొనసాగుతూనే ఉంది. ఇటీవలే కాంగ్రెస్, బీజేపీలకు చెందిన కౌన్సిలర్లు, నాయకులు మంత్రి శ్రీనివాస్ గౌడ్ సమక్షంలో టీఆర్ఎస్ తీర్థం పుచ్చుకున్నారు. తాజాగా గురువారం బీజేపీకి చెందిన 9వ వార్డుకు చెందిన పాలకొండ కౌన్సిలర్ మూస నరేందర్ మంత్రి శ్రీనివాస్ గౌడ్ సమక్షంలో టీఆర్ఎస్ పార్టీలో చేరారు. ఈ సందర్భంగా మంత్రి మాట్లాడుతూ… సాయం కోరి ఎవరైనా తన వద్దకు వస్తే.. రాజకీయాలకతీతంగా ఆదుకుంటున్నట్టు తెలిపారు. ఆ క్రమంలోనే ఆయా పార్టీలకు చెందిన కౌన్సిలర్లు నాయకులు స్వచ్ఛందంగా టీఆర్ఎస్‌లో చేరుతున్నారని వెల్లడించారు. గతంలో పాలకొండ అంటే ఓ మారుమూల ప్రాంతంగా ఉండేదని, మున్సిపాలిటీలో విలీనమయిన తర్వాత పాలకొండ‌ను ఊహించని స్థాయిలో అభివృద్ధి చేసినట్టు తెలిపారు. అనంతరం పార్టీలో చేరిన కౌన్సిలర్ నరేందర్ మాట్లాడుతూ.. మంత్రి డాక్టర్ వి శ్రీనివాస్ గౌడ్ చేపడుతున్న అభివృద్ధి పనులు చూసి తాను టీఆర్ఎస్‌లో చేరుతున్నట్టు తెలిపారు.