పవర్ స్టార్ పునీత్‌కు అరుదైన గౌరవం.. ఆ జంతువుకు ఆయన పేరు (వీడియో)

దిశ, వెబ్‌డెస్క్ : ఇటీవల అకాల మరణం చెందిన శాండల్‌వుడ్ పవర్ స్టార్ పునీత్ రాజ్‌కుమార్‌కు అరుదైన గౌరవం లభించింది. ఆయనకు నివాళులర్పిస్తూ కర్ణాటకలోని శివమొగ్గ జిల్లాలోని ‘సక్రెబైలు’ అనే ఏనుగు శిబిరంలో ఉన్న ఏనుగు పిల్లకు పునీత్ పేరు పెట్టారు. అయితే, మరణానికి ముందు పునీత్ రాజ్‌కుమార్ ఏనుగుల శిబిరాన్ని సందర్శించారని శివమొగ్గ వన్యప్రాణి విభాగం డిప్యూటీ కన్జర్వేటర్ ఆఫ్ ఫారెస్ట్ ఐఎం నాగరాజ్ తెలిపారు. ‌‌‌

‘అటవీ శాఖ’ డాక్యుమెంటరీ షూటింగ్ కోసం పునీత్ రాజ్‌కుమార్ అక్టోబర్ ప్రారంభంలో ఏనుగుల శిబిరాన్ని సందర్శించారని తెలిపారు. షూటింగ్‌లో భాగంగా వచ్చిన మూవీ సిబ్బంది, నటుడు పునీత్.. రెండు రోజులు సక్రెబైలు క్యాంపులో ఉన్నారని ఆయన చెప్పారు. ‘అక్టోబర్ 29న రాజ్‌కుమార్‌ మృతి చెందడంతో సక్రెబైలు క్యాంపు సిబ్బంది చాలా బాధ పడ్డారని అన్నారు. 2 సంవత్సరాల 2 నెలల వయస్సు ఉన్న చిన్న ఏనుగుకు అధికారికంగా పునీత్ రాజ్ కుమార్ అని పేరు పెట్టినట్టు నాగరాజ్ తెలిపారు. సక్రెబైలు ఏనుగు శిబిరంలో నటుడి పర్యటన గురించి వివరించిన నాగరాజ్.. పునీత్ ఈ పర్యటనలో ఏనుగు నేత్రావతితో ఆడుకున్నాడని అలాగే పరిరక్షణ స్థలానికి మళ్లీ వస్తానని హామీ ఇచ్చారని చెప్పుకొచ్చారు.