Kadapa: ఆటో డ్రైవర్ నిజాయితీ.. ప్రశంసించిన ఎస్పీ

దిశ, కడప: రూ.2 లక్షలు విలువైన బంగారు ఆభరణాలు ఉన్న హ్యాండ్ బ్యాగ్‌ను ఓ మహిళ ఆటోలో మరిచిపోయారు. అయితే ఆ బ్యాగును గుర్తించిన డ్రైవర్ వెంకటసుబ్బయ్య పోలీస్ స్టేషన్‌లో అప్పగించి అందరికి స్ఫూర్తి దాయకంగా నిలిచారు. దీంతో కడప ఎస్పీ సిద్దార్థ్ కౌశల్ ఆటో డ్రైవర్ వెంకటసుబ్బయ్య కు ప్రశంసా పత్రం అందచేసి ప్రత్యేకంగా అభినందించారు. రాజంపేటకు చెందిన మేరువ వెంగమ్మ సిద్ధవటం మండలం జంగాలపల్లెలో తన తల్లి ఇంటికి శుభకార్య నిమిత్తం వెళ్లారు. ఈ నెల 2న కమ్మపల్లెకు వెళ్లి సాయంత్రం ఆటోలో జంగాలపల్లికు తిరిగు ప్రయాణంలో ఆమె వద్ద ఉన్న బ్యాగును ఆటోలో మరిచిపోయారు. అయితే ఈ బ్యాగ్‌ను గుర్తించిన ఆటో డ్రైవర్ వెంటనే సిద్దవటం పోలీస్ స్టేషన్‌కు వెళ్లి ఒంటిమిట్ట సి.ఐ పురుషోత్తం రాజుకు అందచేశారు. బాధిత మహిళకు పోలీసులు ఫోన్ చేసి నగలతో కూడిన బ్యాగు తమ వద్ద ఉందని, వచ్చి తీసుకెళ్లాలని తెలిపారు. దాంతో ఆమె పోలీస్ స్టేషన్ వెళ్లి తీసుకున్నారు. నిజాయితీగా బ్యాగును అప్పగించిన వెంకటసుబ్బయ్యకు, పోలీస్ శాఖకు ఆమె ధన్యవాదాలు తెలియచేశారు.