Breaking: రెచ్చిపోయిన స్మగ్లర్లు.. కారుతో ఢీకొట్టి కానిస్టేబుల్ హత్య

దిశ, వెబ్ డెస్క్: అన్నమయ్య జిల్లాలో దారుణం జరిగింది. ఎర్రచందనం స్మగ్లర్లు బరి తెగించారు. ఎర్రచందనం దొంగిలిస్తూ అడ్డుకోబోయిన టాస్క్‌ఫోర్స్ కానిస్టేబుల్‌ను అత్యంత దారుణంగా కారుతో ఢీకొట్టి హత్య చేశారు. అనంతరం పారిపోయేందుకు యత్నించారు. అయితే పట్టువదలకుండా స్మగ్లర్లు పోలీసులు వెంటపడ్డారు. దీంతో కారును వదిలి ముగ్గురు పారిపోయారు. మరొక వ్యక్తిని పోలీసులు అదుపులోకి తీసుకున్నారు. మొత్తం ఏడు ఎర్రచందనం దుంగలను స్వాధీనం చేసుకున్నారు. అయితే కానిస్టేబుల్ మృతితో పోలీసులు విషాదంలో మునిగిపోయారు.

ఈ తెల్లవారుజామున కేవీపల్లి మండలం హుందేవారిపల్లి వద్ద టాస్క్‌ఫోర్స్ పోలీసులు గస్తీ నిర్వహిస్తున్నారు. అయితే ఓ కారులో నలుగురు వ్యక్తులు అనుమానస్పదంగా కనిపించారు. దీంతో కారును ఆపి చెకింగ్ చేసేందుకు కానిస్టేబుల్ గణేశ్‌తో పాటు మిగిలిన పోలీసులు ప్రయత్నం చేశారు. అయితే కారును ఆపలేదు. దీంతో వారిని పట్టుకునేందుకు కారును వెంబడించారు. ఈ క్రమంలో స్మగ్లర్లు కారును ఆపకుండా కానిస్టేబుల్ గణేశ్‌ను ఢీ కొట్టి పారిపోయేందుకు యత్నించారు. ఈ ఘటనలో కానిస్టేబుల్ గణేశ్ అక్కడికక్కడే మృతి చెందారు.