AP News:ఆ జిల్లాలో ఫ్లెక్సీ వార్..టీడీపీ-జనసేన కార్యకర్తలపై వైసీపీ దాడి

దిశ, మొగల్తూరు:పశ్చిమగోదావరి జిల్లా మొగల్తూరు, కొత్తపాలెంలో గురువారం ఉద్రిక్తత నెలకొంది. సార్వత్రిక ఎన్నికల్లో జనసేన పార్టీకి అనుకూలంగా పనిచేశాడనే కారణంగా మొగల్తూరు మండలం కొత్తపాలెం గ్రామానికి చెందిన తాడి రవికుమార్ అనే జనసేన కార్యకర్తపై గురువారం అదే గ్రామానికి చెందిన వైసీపీ కార్యకర్తలు దాడి చేసి గాయపరిచారు. గ్రామంలో ఈ ఘటనతో ఉద్రిక్తత వాతావరణం నెలకొంది. ఇదే సందర్భంలో వైసీపీ, జనసేన కార్యకర్తల మధ్య ఫ్లెక్సీ విషయమై మొదలైన వాగ్వివాదం ఇరు పక్షాలు బాహాబాహీ తలపడేందుకు దారితీసింది. వైసీపీ కార్యకర్తల దాడిలో జనసేనకు చెందిన తాడి రవి కుమార్ గాయపడ్డారు.

దాడిలో గాయపడిన తాడి రవికుమార్ స్థానికులు చికిత్స నిమిత్తం నరసాపురం ప్రభుత్వ ఆసుపత్రికి తరలించారు. రాష్ట్ర సీఎంగా నారా చంద్రబాబు నాయుడు, మంత్రిగా పవన్ కళ్యాణ్ ప్రమాణ స్వీకారం మహోత్సవం సందర్భంగా గ్రామంలో కామ ఫ్లెక్సీలు ఏర్పాటు చేసుకోగా వాటికి మధ్యలో వైసీపీ కార్యకర్తలు ఉద్దేశపూర్వకంగా ఫ్లెక్సీలు ఏర్పాటు చేశారని జనసేన నాయకులు ఆరోపించారు. గ్రామంలో ఒక శుభ కార్యానికి వెళ్లిన జనసేన కార్యకర్త రవికుమార్ పై వైసీపీ కార్యకర్తలు దాడికి పాల్పడ్డారని జనసేన నాయకుడు మహిలాబత్తుల రాంబాబు తెలిపారు. దాడి చేసిన వారిపై పోలీస్ అధికారులు కఠిన చర్యలు తీసుకోవాలని వారు కోరుతున్నారు. మొగల్తూరు పోలీసులు గ్రామానికి వెళ్లి పరిస్థితిని సమీక్షించారు.