‘మోత మోగిద్దాం’కు భారీ స్పందన.. ఢిల్లీ, ఏపీ, తెలంగాణలోనూ నిరసనలు

దిశ, వెబ్ డెస్క్: ఏపీ మాజీ ముఖ్యమంత్రి చంద్రబాబు అరెస్ట్‌ను నిరసిస్తూ ఆ పార్టీ శ్రేణులు ‘మోత మోగిద్దాం’ కార్యక్రమం చేపట్టారు. ఏపీ వ్యాప్తంగా ఈ కార్యక్రమంలో టీడీపీ శ్రేణులు భారీగా పాల్గొన్నారు. ఇళ్లలో ఉన్న వారు గంటలు, ప్లేట్లు, విజిల్స్ కొడుతూ నిరసన వ్యక్తం చేశారు. వాహనాలతో రోడ్లపై ఉన్న వాళ్లు హారన్ కొడుతూ చంద్రబాబుకు సంఘీభావం తెలిపారు. రాజమండ్రిలో విజిల్ ఊది నారా బ్రాహ్మిణి నిరసన వ్యక్తం చేశారు. హైదరాబాద్‌లో నారా భువనేశ్వరి మోత మోగించారు. హైదరాబాద్ కేబీఆర్ పార్క్ చౌరస్తాలో టీటీడీపీ నేతలు నిరసన వ్యక్తం చేశారు. ఢిల్లీలో నారా లోకేశ్, ఎంపీ రఘురామకృష్ణంరాజు, ఎంపీ కనకమేడల నిరసన వ్యక్తం చేశారు. చంద్రబాబును అక్రమంగా అరెస్ట్ చేశారని మండిపడ్డారు. మంగళగిరి టీడీపీ కార్యాలయంలో అచ్చెన్నాయుడు నిరసన తెలిపారు. తెలుగు రాష్ట్రాలతో సహా వివిధ ప్రాంతాల్లో ప్రజలు సైతం మోత మోగిద్దాం కార్యక్రమంలో పాల్గొన్నారు. ఇప్పటికైనా చంద్రబాబుపై పెట్టిన అక్రమ కేసులు ఎత్తివేయాలని డిమాండ్ చేశారు.