Mudragada: ‘కబుర్లు చెప్పడంలో మీకు మీరే సాటి..’ సీఎం చంద్రబాబుకు ముద్రగడ షాకింగ్ లెటర్

దిశ, వెబ్‌డెస్క్: ఏపీ అసెంబ్లీ ఎన్నికల సమయంలో కూటమికి ఓట్లు వేయొద్దంటూ రాష్ట్ర ప్రజలకు లేఖ బహిరంగ లేఖలు రాసిన కాపు ఉద్యమ నేత, వైఎస్సార్‌సీపీ కీలక నాయకుడు ముద్రగడ పద్మనాభం (Mudragada padmanabham) ఇప్పుడు ఏపీ ముఖ్యమంత్రి చంద్రబాబు నాయుడికి రాసిన లేఖ వైరల్ అవుతోంది. ‘డైవర్షన్ పాలిటిక్స్ చేయడంలో మీకు మీరే సాటి. అది మీకు వెన్నతో పెట్టిన విద్య’ అంటూ తన లేఖలో చంద్రబాబును ఎద్దేవా చేశారు ముద్రగడ. శుక్రవారం నాడు ఆయన రాసిన ఈ లేఖలో సూపర్ సిక్స్ హామీలను అమలు చేయలేకే తిరుపతి లడ్డూ వివాదం, సోషల్ మీడియా యాక్టివిస్టులపై కేసులు, రెడ్ బుక్ వేధింపులు చేస్తున్నారంటూ చంద్రబాబుపై, కూటమి ప్రభుత్వంపై ఆరోపణలు గుప్పించారు. అమాయకులపై కేసులు వేసి జైల్లో పెట్టి కొట్టించడం ఏంటని ప్రశ్నించారు.

అలాగే అధికార దాహం తీర్చుకోవడానికి సూపర్ సిక్స్ హామీలు చ్చిన ప్రభుత్వం వాటిని ఎత్తేసే ప్రయత్నాలు చేయొద్దని హితవు పలికారు. ‘‘ఇచ్చిన హమీలు అమలు చేయలేక చేతులు ఎత్తేయడం మీలాంటి సీనియర్ రాజకీయ నాయకులకు తగునా? మీ దొంగ సూపర్ సిక్స్ హమీలను తలచుకుంటే భయం వేస్తొంది. సొల్లు కబుర్లు చెప్పడంలో మీకు మీరే సాటి. సూపర్ సిక్స్ అమలు చేయాలంటే కోట్లాది రూపాయాల నిధులు కావాలని మీకు తెలియదా?. తెలిసి కూడా అబద్దాలు చెప్పి ఎందుకు ఓట్లు వేయించుకున్నారు. ప్రజలకు సూపర్ సిక్స్ గుర్తుకు రాకుండా తిరుపతి ప్రసాదం, రెడ్ బుక్ రాజ్యంగం, సోషల్ మీడియా యాక్టివిస్ట్‌లను అరెస్ట్ వంటి వివాదాలను తెరపైకి తెస్తున్నారు. డైవర్షన్ పాలిటిక్స్ మీకు వెన్నతో పెట్టిన విద్య’’ అంటూ ముద్రగడ రాసిన ఈ లేఖ ఇప్పుడు వైరల్ అవుతోంది.