Ap News: చంద్రబాబు అరెస్ట్‌తో ఆగిన మరో గుండె

దిశ, ఎమ్మిగనూరు: స్కిల్ డెవలప్‌మెంట్ కేసులో ముద్దాయిగా చూపుతూ నారా చంద్రబాబు నాయుడును అరెస్టు చేయడాన్ని జీర్ణించుకోలేక ఎమ్మిగనూరు నియోజకవర్గం నందవరం మండలం ముగతి గ్రామానికి చెందిన మాసిపోగు నాగరాజు (42) మృతి చెందారు. చంద్రబాబును అరెస్ట్ చేసిన రోజు నుంచి ఆయన తీవ్ర మనస్తాపానికి గురయ్యారని కుటుంబ సభ్యులు చెబుతున్నారు. ఇవాళ ఛాతీలో నొప్పిరావడంతో నాగరాజును హాస్పిటల్‌కు తరలించారు. అయితే అప్పటికే నాగరాజు చనిపోయినట్లు వైద్యులు తెలిపారు. దీంతో నాగరాజు మృతదేహాన్ని ముగతి గ్రామానికి తరలించారు. విషయం తెలుసుకున్న మాజీ ఎమ్మెల్యే బీవీ జయనాగేశ్వర రెడ్డి, మాజీ జెడ్పీటీసీ ముగతి ఈరన్న గౌడ్‌ నాగరాజు భౌతికకాయనికి నివాళులు అర్పించి, ఆయన కుటుంబ సభ్యులను పరామర్శించారు.

ఈ సందర్భంగా నాగేశ్వర రెడ్డి మాట్లాడుతూ చంద్రబాబు అరెస్ట్‌తో టీడీపీ కార్యకర్తలు, అభిమానులు మృతి చెందడం బాధాకరమన్నారు. మృతి చెందిన వారి  కుటుంబాలకు తెలుగుదేశం పార్టీ ఎల్లప్పుడూ అండగా ఉంటుందని తెలిపారు.