రోడ్డు ప్రమాదం.. తిరుమల శ్రీవారి ఆలయ పరిచారికుడు మృతి

దిశ, తిరుమల: నిత్యం స్వామి వారి కైంకర్య సేవలో పరిచారికుడు ప్రమాదవశాత్తు రోడ్డు ప్రమాదంలో మృతి చెందారు. తిరుమల శ్రీవారి ఆలయంలో జియ్యంగార్లకు, అర్చకులకు సహాయకులుగా కె.యతిరాజ నరసింహన్ పని చేస్తున్నారు. ఆలయంలో విధులు ముగించుకుని తిరుపతిలోని ఇంటికి స్కూటర్‌పై బయల్దేరారు. మొదటి ఘాట్ రోడ్డు 37వ టర్నింగ్ వద్ద రోడ్డు ప్రమాదానికి గురయ్యారు. నరసింహన్ బైక్‌ను మంగళం డిపో ఆర్టీసీ బస్సు ఢీ కొట్టింది. ఈ ఘటనలో నరసింహన్ అక్కడికక్కడే మృతి చెందారు. విషయం తెలుసుకున్న పోలీసులు ఘటన స్థలాన్ని పరిశీలించారు. నరసింహన్ మృతదేహాన్ని పోస్టుమార్టం నిమిత్తం తిరుపతి ఎస్వీ మెడికల్ కళాశాలకు తరలించారు. పోలీసులు కేసు నమోదు చేసుకుని దర్యాప్తు చేస్తున్నారు.