ఏపీని హడలెత్తిస్తున్న మంకీఫాక్స్.. ప్రభుత్వం కీలక నిర్ణయం

దిశ, డైనమిక్​ బ్యూరో: ప్రపంచవాప్తంగా హడలెత్తిస్తున్న మంకీఫాక్స్ ​వ్యాధి వ్యాప్తిని అడ్డుకునేందుకు ఏపీ ప్రభుత్వం చర్యలకు ఉప్రకమించింది. దుబాయ్​నుంచి విజయవాడకు వచ్చిన ఓ చిన్నారికి మంకీఫాక్స్​ లక్షణాలు ఉన్నాయనంటూ వార్తలు వచ్చిన నేపథ్యంలో ప్రభుత్వం ముందస్తు చర్యలు చేపట్టింది. ఇందుకోసం విజయవాడ కొత్త ప్రభుత్వ ఆస్పత్రిలో ఆరు పడకలతో ఓ వార్డును సిద్ధం చేసింది. ఇందులో అధునాతన పరికరాలను అందుబాటులో ఉంచింది. దేశంలో మంకీఫాక్స్​కేసులు పెరుగుతున్నందున ఏపీ ప్రభుత్వం ఈ నిర్ణయం తీసుకుంది. ఏపీలో మంకీ ఫాక్స్ ​కేసులు నమోదైతే యుద్ధ ప్రాతిపదికన చర్యలు చేపట్టేందుకు ఏర్పాట్లు చేసింది. సూపర్​ స్పెషాలిటీ బ్లాక్​లో ఈ ప్రత్యేక వార్డును ఏర్పాటు చేసినట్లు ఆస్పత్రి సూపరింటెండెంట్​ డాక్టర్​ వెంకటేష్​ తెలిపారు. అన్ని రకాల ఇంజక్షన్లను అందుబాటులో ఉంచామని ఆయన పేర్కొన్నారు.

అంతటా అప్రమత్తం..

ఇప్పటికే భారత ప్రభుత్వం దీనిపై అప్రమత్తమైంది. డబ్యూహెచ్‌ఓ ​హెచ్చరికల నేపథ్యంలో ప్రధాని మోడీ అధ్యక్షతన ఉన్నత స్థాయి సమావేశాన్ని నిర్వహించింది. అన్ని రాష్ట్రాల్లో టెస్టింగ్​ కేంద్రాలను ఏర్పాటు చేయాలని సూచించింది. అన్ని విమానాశ్రయాలను కూడా అప్రమత్తం చేసి విదేశాల నుంచి వచ్చేవారికి వైద్య పరీక్షలు చేయాలని తెలిపింది. పక్కనే ఉన్న తెలంగాణ ప్రభుత్వం కూడా అప్రమత్తమైంది. హైదరాబాద్ లోని గాంధీ, నల్లకుంట ఫీవర్‌ ఆస్పత్రులలో ప్రత్యేక వార్డులు ఏర్పాటు చేశారు. గాంధీ ఆసుపత్రిలో ఇందుకోసం కోసం ప్రస్తుతం 20 పడకలు కేటాయించారు. అయితే రెండు తెలుగు రాష్ట్రాల్లో ఇంతవరకు ఎటువంటి కేసులు నమోదు కాలేదని అధికారులు చెబుతున్నారు. తాము పూర్తి స్థాయి అప్రమత్తంగా ఉన్నట్టు వైద్య ఆరోగ్య శాఖ అధికారులు అంటున్నారు. ఇందులో భాగంగా ఏపీలో మొదటిసారిగా విజయవాడలో ప్రత్యేక వార్డును ఏర్పాటు చేశారు.

లక్షణాలివే.. అయినా భయపడాల్సిన పనిలేదు..

ఈ సమస్య రాగానే జ్వరం, నొప్పులు, విపరీతమైన చలి, చర్మంపై దద్దర్లు, శ్వాస తీసుకోవడంలో ఇబ్బంది, గొంతునొప్పి వంటి సమస్యలు కనిపిస్తాయని వైద్యులు చెబుతున్నారు. ఇది వచ్చిన వారికి సన్నిహితంగా ఉండడంతో వస్తుంది. చెమట, ఇతర శరీర ద్రవాల వల్ల ఇది ఒకరి నుంచి మరొకరికి వ్యాపిస్తుందని, వ్యాధి వచ్చిన వారు వాడే వస్తువులు, బట్టలు, మంచం, దిండు వంటివి వాడడం వల్ల కూడా వస్తుందని పేర్కొంటున్నారు. అయితే మంకీపాక్స్ కోవిడ్ లా ప్రమాదకారి కాదని ప్రపంచ ఆరోగ్య సంస్థ తేల్చేసింది. కొవిడ్ సమయంలో వ్యవహరించిన తరహాలోనే అప్రమత్తంగా ఉంటే సరిపోతుందని పేర్కొంది.

మంకీ ఫాక్స్​ నిర్ధరణ కిట్​ రూపొందించింది మన రాష్ర్టంలోనే..

మంకీఫాక్స్​ నిర్ధరాణ కోసం విశాఖ మెడిటెక్​తొలి ఆర్టీ పీసీఆర్​ కిట్​ను రూపొందించింది. ఈ కిట్​కు ఐసీఎంఆర్​, సీడీఎస్​సీవో నుంచి అత్యవసర అనుమతి కూడా లభించింది. కరోనా సమయంలో అనేక దేశీయ ఆరోగ్య సంబధింత ఉత్పత్తులను అందించిన మెడ్‌టెక్ జోన్ తాజాగా మంకీపాక్స్ నిర్ధారణ కోసం దేశీయంగా తొలి ఆర్టీ – పీసీఆర్ కిట్‌ను ఉత్పత్తి చేయడంతో రాష్టానికి ఓ మంచి గుర్తింపు వచ్చినట్లయింది. గత శనివారం ఈ కిట్​ను ఆవిష్కరించారు.