పెళ్లింట విషాదం..ఘోర రోడ్డు ప్రమాదంలో ఇద్దరు మృతి

దిశ,రాజంపేట:మరో రెండు రోజుల్లో పెళ్లి బాజాలు మోగాల్సిన ఆ ఇంట విషాదం నెలకొంది.రోడ్డు ప్రమాదంలో కారు రూపంలో మృత్యువు ద్విచక్ర వాహనాన్ని ఢీకొన్న ఘటనలో పెళ్లి కుమారుడి తండ్రి లవమ రామచంద్ర రెడ్డి తో పాటు వారి బంధువు వెంకటసుబ్బారెడ్డి మృతి చెందడంతో ఆ ఇంట విషాదఛాయలు అలుముకున్నాయి.ఒంటిమిట్ట మండలం నడింపల్లి గ్రామానికి చెందిన లవమ రామచంద్రారెడ్డి కుమారుడి వివాహం గురువారం జరగనుంది.పెళ్లి ఏర్పాటులో భాగంగా రామచంద్రా రెడ్డి, తన బంధువు అయినా వెంకటసుబ్బారెడ్డి నీ సోమవారం ఉదయం మండల కేంద్రమైన ఒంటిమిట్టకు వచ్చి పని చూసుకొని తిరిగి ఇంటికి ద్విచక్ర వాహనంలో బయలుదేరారు.

ఇక ఐదు నిమిషాల్లో ఇంటికి చేరుకుంటాము అనుకునే లోపు కడప వైపు నుంచి మృత్యువు రూపంలో వచ్చిన కారు ద్విచక్ర వాహనాన్ని నడింపల్లి వద్ద ఢీకొంది. దీంతో వెంకటసుబ్బారెడ్డి ఘటనా స్థలంలో చనిపోయారు. రామచంద్ర రెడ్డి ని 108 వాహనంలో ఆస్పత్రికి తీసుకెళ్తూ ఉండగా మార్గమధ్యంలో చనిపోయారు. పోలీసులు కేసు నమోదు చేసి దర్యాప్తు చేపట్టారు. పోస్టుమార్టం నిమిత్తం మృతదేహాలను కడప రిమ్స్ కు తరలించారు.