రెండు గంటలు ఏం చేయకున్నా మిలియన్ల వీక్షణలు

యూట్యూబ్‌లో వైరల్ వీడియోలను చూస్తే, వాటి వీక్షణలు మిలియన్ల కొద్దీ ఉంటాయి. అయితే ఆ వీడియోల్లో ఎంతో కొంత కంటెంట్ ఉంటుంది. ఆ కంటెంట్‌ను సృష్టించడంలో వీడియో చేసిన వారి కష్టం దాగుంటుంది. అవన్నీ పది నిమిషాల నుంచి ఒక గంట నిడివిని కలిగి ఉంటాయి. దాదాపు రెండు గంటల వైరల్ కంటెంట్‌ను ఒక్కడే యూట్యూబర్ తయారుచేయాలంటే చాలా కష్టం. కానీ ఇండోనేషియాకు చెందిన ఓ రెండు గంటల వీడియో ఇప్పుడు చాలా వైరల్ అవుతోంది. అసలు ఆ వీడియోలోని కంటెంట్ గురించి తెలిస్తే షాక్ అవుతారు. ఇంతకీ ఆ వీడియోలో ఏం చేశాడో తెలుసా? రెండు గంటల పాటు ఖాళీగా కూర్చున్నాడు. అవును.. ఊరికే కెమెరాను తదేకంగా చూస్తూ రెండు గంటలు కూర్చున్నాడు. ఇప్పుడు ఆ వీడియోకు దాదాపు 2 మిలియన్ల వీక్షణలు వచ్చాయి.

‘2 గంటలపాటు ఏం చేయకుండా ఉండటం’ అనే పేరుతో ఇండోనేషియన్ యూట్యూబర్ మహ్మద్ దిడిత్.. ఈ వీడియోను జులై 10న పోస్ట్ చేశాడు. ఈ వీడియో చేయడానికి వెనకున్న అర్థాన్ని కూడా దిడిత్ బయటపెట్టాడు. తను రెగ్యులర్‌గా చేస్తున్న వీడియోల కింద యువతకు ఉపయోగపడే వీడియోలు చేయాలని చాలా మంది సలహాలిస్తున్నారట. అందుకే వారి సలహా మేరకు దిడిత్ ఈ వీడియో చేశాడు. ఇందులో ఉపయోగం ఏముందని అడిగితే.. అది మీరే తెలుసుకోవాలి, ఇప్పుడు యువత దగ్గర రెండు గంటలు కాదు, 24 గంటల ఖాళీ సమయం ఉంది, ఎవరూ ఉపయోగపడే పని చేయడం లేదనేది ఈ వీడియో నిగూఢార్థమని దిడిత్ అంటున్నాడు. దిడిత్ అన్నదే నిజమని.. ఈ వీడియోకు వచ్చిన వీక్షణలు చూస్తే తెలుస్తోంది. అంతేకాకుండా దిడిత్ ఎంతసేపు కనురెప్పలు కొట్టాడో లెక్కపెట్టి కామెంట్ చేసిన వాళ్లు, వారి లెక్క తప్పు అంటూ మరొకరు మళ్లీ లెక్కపెట్టి కామెంట్ చేయడాలు చూస్తుంటే యువత నిజంగానే చాలా ఖాళీగా ఉన్నారనిపిస్తోంది.